Fatlaðir þurfa að sækja um undanþágur vegna greiðslukorta

Hingað til hefur verið hægt að komast hjá því að stimpla inn pin-númer þegar greitt er fyrir vörur með greiðslukorti með því að smella á græna hnapp posans. Frá og með mánudeginum 19.janúar verður það þó ekki hægt en eftir þann tíma verða allir að slá inn lykilorð, eða „pinnið“.

Ekki hafa allir andlega og/eða líkamlega getu til þess að leggja lykilorð á minnið eða framkvæma þá aðgerð sem krafist er þegar greitt er með greiðslukorti. Græni hnappurinn hefur því reynst þeim hópi fólks afar vel. Undanþágur verða þó veittar þeim sem ekki hafa tök á greiðslukorti með pinni, en um þær þarf að sækja sérstaklega.

„Í þessum tilvikum þarf fólk að hafa samband við sitt þjónustuver eða útibú og þá munum við meta hvert tilvik fyrir sig,“ segir Guðný Helga Herbertsdóttir, upplýsingafulltrúi Íslandsbanka. Hún segir að allar helstu upplýsingar um hvert fólk geti snúið sér eftir breytinguna verði aðgengilegar á vef bankans á næstu dögum.

Sérstaklega mikilvægt að auglýsa þetta vel

Ekki hafa verið birtar tilkynningar á vefsíðum bankanna um breytingarnar, né hvernig undanþágunum verður háttað. Samkvæmt upplýsingafulltrúum sem Vísir ræddi við í dag eru þó líkur á að allir þurfi að leita í sinn viðskiptabanka. Það sé þó ekki fullvíst en að tilkynningar þess efnis verði sendar út á næstu dögum.

„Það er sérstaklega mikilvægt að auglýsa þetta vel. Það eru ákveðnir hópar sem eiga bágt með að leggja pinnið á minnið og það þarf að vera lausn fyrir þann hóp. Lausnin er fín en auðvitað getur það reynst fötluðum og öðrum erfitt að fara í bankann. Þau þurfa því að fara í gegnum miklu lengra ferli en aðrir,“ segir Ellen Calmon, formaður Öryrkjabandalags Íslands.

Unnin var grein fyrir stjórn verkefnisins Pinnið á minnið árið 2012 undir yfirskriftinni Aðgengi fyrir alla. Þar segir að mikilvægt sé að hafa hugfast að korthafar megi ekki upplýsa aðra, þar á meðal aðstoðarfólk, um pinnið. Ef korthafar geti af einhverjum ástæðum ekki slegið pinnið í posann eða lagt pinnið á minnið eru þeir hvattir til að hafa samband við sinn útgefanda, banka eða sparisjóð, og leita lausna.

Steingrímur Sigurgeirsson fjölmiðlafulltrúi Pinnsins segir fyrirkomulagið hafa gengið vel fyrir sig á undanförnum árum og býst við að engin breyting verði þar á.