Ekki hefur tekist að stöðva suðið á Akureyri

„Hljóðið heyrist greinilega ennþá. Ég held að þetta heyrist nokkuð víða úr bænum en áberandi kvartanir eru úr innbænum en ég veit að þetta heyrist víðar,“ segir María Markúsdóttir hjá Heilbrigðiseftirliti Norðulands um eitt umtalaðasta suð landsins, lágtíðniniðinn sem er sagður berast frá loftblásara í Vaðlaheiðargöngum og hefur valdið Akureyringum ónæði.

Ekki er um hávaða að ræða að sögn Maríu en hljóðið sé vissulega truflandi fyrir þá sem heyra það.

Fyrir jól var byggður kassi utan um blásarann til að reyna að dempa hljóðið en María segir ljóst að sú lausn hafi ekki skilað tilætluðum árangri. „Það þarf að finna aðrar lausnir,“ segir María en Heilbrigðisnefnd Norðurlands eystra fundaði á miðvikudag þar sem málið var tekið til umfjöllunar.

Segir María að það komi til greina að krefjast þess að Ósafl ehf., sem annast gerð ganganna fyrir hönd IAV hf. og svissneska fyrirtækisins Marti Contractors lts, setji tímastilli á blásarann. „Þá myndum við hugsa um þann tíma þegar fólk gengur til náðar,“ segir María.

Hún segir hljóðið vera lágtíðninið sem heyrist þegar kyrrt er úti, engin umferð og logn, eða um það leyti þegar fólk fer að sofa. „Það er það sem ónáðar,“ segir María sem mun funda með Ósafli klukkan 13 í dag.