Örugglega síðasta kjörtímabil Ólafs Ragnars

Guðni Th. Jóhannesson sagnfræðingur segir að allt bendi til þess að Ólafur Ragnar muni ekki bjóða sig fram aftur til forseta. 

Þrífst ekki á gagnrýni einni saman

Ólafur Ragnar hvatti í dag til vitundar um árangur þjóðarinnar. Fremstu háskólar Bandaríkjanna, Harvard og Cornell, og Alþjóða efnahagsráðsins setji Ísland nú meðal efstu þjóða heims á mörgum sviðum.  Líta þyrfti á það sem vel er gert og að þjóðin gæti aldrei þrifist á gagnrýninni einni saman þótt hún væri hluti af lýðræðinu.



Ekki Pollýanna né puntudúkka á Bessastöðum

Guðni Th. sagði í fréttum Stöðvar 2 í kvöld að það sem Ólafur Ragnar gagnrýndi í ávarpinu sé í sjálfu sér gagnrýnisvert líka „Forseta fannst að síðustu ár hafi gagnrýnisraddirnar verið of háværar og að menn megi ekki missa sig í að benda á það sem betur mætti fara. Vissulega er það hlutverk þjóðhöfðingja að vera bjartsýnn en svo eru aðrir í samfélaginu eins og fjölmiðlar og fræðasamfélag sem eiga beinlínis að veita aðhald og forsetinn sagði einu sinni að á Bessastöðum mætti ekki vera puntudúkka en þar mætti heldur ekki vera Pllýanna", sagði Guðni. 



Lítur á að sín sé enn þörf

Í forsetakosningum sumarið 2012 gaf Ólafur Ragnar út að svo kynni vera að hann sæti einungis í hálft kjörtímaabil, á meðan Icesavemálið væri óleyst. Ekkert kom fram í dag um hvort það væri enn svo en kjörtímabilið er rúmlega hálfnað.

„Þetta verður alveg örugglega síðasta kjörtímabil forsetans. Við sjáum það til dæmis á því að formlegum ræðum hans hefur fækkað mjög frá því sem áður var. Árið 2012 sagði hann að væri komin ró og friður  og sléttur sjór framundan, þá myndi hann hætta. Greinilega lítur hann þá svo á hans sé enn þörf á Bessastöðum", sagði Guðni ennfremur.