Ólíkar áherslur hjá Bjarna Ben og Sigmundi Davíð í kjarasamningum

Augljós áherslumunur er hjá oddvitum ríkisstjórnarflokkanna um hvaða leið sé best að fara í komandi kjarasamningum. Sigmundur Davíð Gunnlaugsson forsætisráðherra lýsti því yfir á þingi að krónutöluhækkun væri skynsamleg nálgun í komandi kjaraviðræðum.

„Ég held að ég og háttvirtur þingmaður séum nánast sammála um mikilvægi þess að forgangsraða á þann hátt að sérstaklega verði komið til móts við fólk með lægri tekjur og millitekjur og að það sé vel gert, jafnvel best gert, með áherslu á krónutöluhækkanir. Ýmsar vísbendingar eru um að þrátt fyrir að krónutöluhækkanir hafi á stundum leitt til launaskriðs í formi prósentuhækkana upp launastigann hafi slíkar hækkanir engu að síður oft og tíðum reynst vel.“

Líkt og Fréttablaðið greindi frá í gær hefur Bjarni Benediktsson fjármálaráðherra lýst því yfir að honum hugnist best að semja um kaupmáttaraukningu frekar en krónutöluhækkun. Fréttablaðið bar þennan skoðanamun oddvita ríkisstjórnarinnar undir fjármálaráðherra og fer það samtal hér á eftir í heild sinni:

Er ósamræmi?

Stangast það sem þú og forsætisráðherra hafa sagt um kjaraviðræður ekki á?

„Ég ætla ekki að segja aðilum vinnumarkaðarins fyrir um það hvernig þeir ná samkomulagi sín í milli, eða stéttarfélögunum um það hvernig þeir stilla fram sinni kröfugerð. Þeir hafa að sjálfsögðu sjálfdæmi um það. Hins vegar er ég bara að vekja athygli á þeirri staðreynd að nafnlaunahækkanir miklar hafa sögulega haft tilhneigingu til að velta út í verðlagið og leita upp launastigann.

Að því leytinu til ættu menn að gæta varúðar ef það er leiðin sem menn vilja almennt fara, en eins og bent hefur verið á þá er engin ein lína í viðræðunum enn sem komið er, enda eru mörg aðildarfélaga ASÍ að semja hvert fyrir sig.“

Ertu sammála Sigmundi?

En nú sagði forsætisráðherra á þinginu í gær að hann væri fylgjandi þeirri leið að fara í umtalsverðar krónutöluhækkanir á lægstu launum, ert þú sammála því?

„Í þessum orðum felst í sjálfu sér ekki annað en að áherslurnar eigi að vera á að bæta kjör þeirra sem eru verst settir. Það er ekki hægt að vera á móti þeirri aðferðafræði, það er bara spurning hvernig hægt er að hrinda henni í framkvæmd þannig að það verði ekki á endanum sama hækkunin fyrir alla.“

Eruð þið þá sammála?

En eruð þið sammála um hvaða leið á að fara í þessu?

„Ég er sammála því að að stórum hluta til þá snúast kjaraviðræður um að rétta hlut þeirra sem njóta til dæmis ekki launaskriðsins, sitja almennt uppi með berstrípaðar kjarasamningahækkanir. Það hefur verið bent á að það eru oft og tíðum launalægstu hóparnir, ekki millistjórnendur eða stjórnendur í atvinnulífinu, sem almennt eru að fá umsamdar kjarabætur auk launaskriðs. Við þessu þarf að bregðast með einhverjum hætti.“

Vilt þú gera það sama og hann?

En viltu gera það eins og forsætisráðherra leggur til, að fara í krónutöluhækkun?

„Ég ætla ekki að hafa sterkar skoðanir á því hvernig stéttarfélögin stilla fram sínum kröfum. Ég ætla að eftirláta þeim það alveg og láta þá afskiptalausa af því.“

Einhverjar kröfur eru nú komnar fram nú þegar…

„Já. Mér er langmest hugað um það, ekki nákvæmlega hvernig menn stilla fram kröfum sínum, heldur að heildarniðurstaðan verði til þess að styðja við þann stöðugleika sem hefur náðst.“

En eruð þið sammála?

Fæ ég þig ekki til að segja af eða á um hvort þú sért sammála forsætisráðherra?

„Hvers vegna ætti ég að hafa mjög sterkar skoðanir á því hvernig einstaka samningsaðilar stilla fram sínum kröfum? Þeir eru bara frjálsir að því.“

En þú ert náttúrulega samningsaðili fyrir hönd ríkisins að einhverjum samningum…

„Já, já, og við munum bregðast við þeim eftir því sem þær koma fram og það gerum við bara með okkar samninganefnd.

Mín athugasemd er bara þessi, að kaupmáttarleiðin, sú sem valin var síðast, hún er líklegri til árangurs í mínum huga heldur en nafnlaunahækkanir miklar.“