Stóð veiðiþjófa að verki í Skjálftavatni

Þrír menn hafa verið kærðir fyrir veiðiþjófnað í Skjálftavatni, vatnasvæði Litluár í Kelduhverfi, sem átti sér stað í byrjun mánaðarins. Veiðisvæðið hefur verið í útleigu um nokkurra ára skeið og er aðeins veitt og sleppt í ánni.

Sænskur rannsóknarlögreglumaður, sem var við veiði í Litluá, tók eftir grunsamlegum mannaferðum við Skjálftavatn þetta umrædda kvöld og ákvað að grennslast fyrir um ferðir mannanna. Grunur hans reyndist á rökum reistur þar sem þeir gengu með mikið magn fiskjar til bifreiðar sinnar. Höfðu þeir notað net og er talið að á annað hundrað kíló af fiski hafi verið tekin ófrjálsri hendi.

Sturla Sigtryggsson, einn þeirra sem eru með svæðið á leigu, segir hér um kláran veiðiþjófnað að ræða. 

„Það sást til mannanna koma með net inn í Skjálftavatn undir miðnætti og tóku þeir rúmlega eitt hundrað kíló af silungi með sér eftir þessa för. Við lítum þetta alvarlegum augum og höfum kært málið til lögreglu,“ segir Sturla. Hann tekur fram að landeigendur á svæðinu hafi ekki verið þarna að verki en einn mannanna sé tengdur landeiganda.

„Við greiðum landeigendum um sex milljónir á ári fyrir leigu á veiðiréttindum og því orkar það tvímælis þegar menn tengdir landeigendum ná sér í fisk með þessum hætti í á sem leigð er út sem náttúruperla þar sem skylda er að sleppa öllum fiski.“



Aðalsteinn Júlíusson, varðstjóri lögreglunnar á Húsavík, staðfesti í gær að kæra hefði borist og verið væri að taka skýrslur vegna rannsóknarinnar. Leigutakar væru á þeirri skoðun að hér væri um brot á reglum um lax- og silungsveiði að ræða. Hann vildi að öðru leyti ekki tjá sig um málið þar sem það væri í rannsókn. 

Erlendur Steinar Friðriksson fiskifræðingur segir bleikjustofninn í Litluá og Skjálftavatni líklega einsdæmi á Íslandi og þótt víðar væri leitað. Stærð bleikjunnar á svæðinu sé með ólíkindum. 

„Í ánni hefur verið náð miklum árangri með því að sleppa öllum veiddum fiski í nokkur ár og búa til stórskemmtilega á með löngu veiðitímabili. Á síðasta ári veiddust í ánni langstærstu bleikjur ársins og var stærsta bleikjan um 90 sentimetrar að stærð og vó níu kíló. Þetta jaðrar við heimsmet og stofninn þarna er mjög merkilegur fyrir þessar sakir,“ segir Erlendur Steinar.