Fór inn í bíla í Teigahverfi

Lögreglunni á höfuðborgarsvæðinu barst í nótt tilkynning um mann sem fór inn í bifreiðar í Teigahverfi í Reykjavík á þriðja tímanum í nótt. Samkvæmt dagbók lögreglunnar var maðurinn handtekinn og vistaður í fangageymslur fyrir rannsókn máls.

Þá stöðvaðir lögreglan för þriggja ökumanna á höfuðborgarsvæðinu í gær og í nótt vegna gruns um að þeir hefðu ekið undir áhrifum fíkniefna.

Um kvöldmatarleitið í gærkvöldi barst lögreglunni tilkynning um mikla kannabislykt frá íbúð í vesturborg Reykjavíkur. Lögreglan hafði afskipti af fólki sem býr í íbúðinni og framvísaði það ætluðum fíkniefnum. Var málið afgreitt á vettvangi.

Tíu aðilar gistu fangageymslu lögreglunnar fyrir ýmis mál en þrír þeirra eru útigangsmenn sem frekar hefðu óskað eftir gistingu í Gistiskýlinu ef þar hefði verið laust pláss.