Tólf mánaða nálgunarbann: Ákærður fyrir að hafa kveikt í á heimili barnsmóður og birt af henni nektarmyndir

Hæstiréttur staðfesti í dag úrskurð Héraðsdóms Vesturlands frá því í síðasta mánuði um að karlmanni verði gert að sæta tólf mánaða nálgunarbanni gagnvart barnsmóður sinni. Þetta er í þriðja sinn sem manninum er gert að sæta nálgunarbanni gagnvart konunni en síðasta nálgunarbann, sem var einnig til tólf mánaða, rann út í janúar síðastliðnum.

Í dómi héraðsdóms kemur fram að lögreglustjórinn á Vesturlandi telji ljóst að eftir að síðasta nálgunarbann rann út hafi ónæði konunnar vegna ófriðar mannsins versnað til muna. Meðal annars hafi komið fram ummæli sem ekki væri hægt að taka öðruvísi en sem hótunum.

Maðurinn og konan bjuggu saman ásamt syni sínum á Selfossi fram á haustið 2012. Í kjölfar sambúðarslita þeirra réðst maðurinn að barnmóður sinni, veitti henni áverka og var honum í kjölfarið gert að sæta nálgunarbanni í tvo mánuði. Hann braut gegn því banni.

Sakamál gegn manninum er nú til meðferðar við Héraðsdóm Suðurlands en hann er meðal annars ákærður fyrir að hafa kveikt í á heimili konunnar og birt nektarmyndir af henni. Konan segir að eftir að sú ákæra hafi verið gefin út hafi maðurinn linnulítið áreitt hana með SMS-skeytum, skilaboðum á Facebook og munnlegum hótunum.

Maðurinn þarf að halda sig í fimmtíu metra radíus frá heimili konunnar og má ekki nálgast hana á almannafæri eða vinnustað, hringja í hana, senda henni SMS-skeyti eða tölvupóst, rita á samskiptasíður hennar á internetinu eða setja sig á annan hátt í samband við hana til og með 15. maí 2016.