Eyddi tæpri milljón í munntóbak og ætlar að hjálpa öðrum að hætta

„Það kom mér á óvart hvað þetta var mikið þegar ég sá þetta dós fyrir dós,“ segir Jón Kári Eldon en fyrir ári síðan hætti hann að neyta munntóbaks. Til að fagna árangrinum setti hann vefsíðuna BaggErBögg.is.

Á síðunni setur Jón Kári neyslu sína fram á myndrænan hátt en hann var virkur neytandi í tíu ár áður en hann hætti. Eftir ár án tóbaks segist hann vera við betri heilsu, kátari og nokkrum þúsundköllum ríkari. Honum reiknast til að hann hafi verið á níu hundrað þúsund krónum í munntóbak og magnið sé líklegast í kringum 36 kíló.

„Maður heyrir oft talað um magnið en maður sér alltaf bara tölur en engar myndir. Ég tók saman mína neyslu sem er frekar venjuleg og ábyggilega eitthvað sem margir geta tengt við.“

Vinur Jóns Kára hafði oft hvatt mig til að hætta og ég hafði alltaf svarað með því að ég gæti það en hefði ekki áhuga. Einn daginn tók ég þá ákvörðun að hætta, opinberaði það á Twitter og hélt dagbók um það þar.“

Hann segir að það að segja frá markmiðinu hafi hjálpað mikið. Margir vinir hans hafi hætt en bara haldið því fyrir sig og í kjölfarið fallið. „Ef maður segir frá þá er erfiðara að bakka út úr því og fólk er líklegra til að veita manni stuðning.“

Fyrstu dagarnir voru erfiðastir en skyndilega hafði Jón lokið þrjátíu dögum án tóbaks. Þá féll hann en hætti á ný strax daginn eftir. Síðan þá hefur hann ekki snert tóbak.

Jón Kári stundar nám í vefhönnun og nýmiðlun úti í San Francisco þar sem hann er á knattspyrnustyrk. Vefinn hannaði hann sjálfur frá grunni. Á sumrin spilar hann fótbolta með Knattspyrnufélagi Vesturbæjar en þegar blaðamaður náði tali af honum var hann leið til Seyðisfjarðar til að keppa við Huginn.

„Ég held að það sé auðveldara að hætta þarna úti því menningin er öðruvísi. Það eru ekki allir með tóbak í kringum þig líkt og hérna heima,“ segir Jón Kári. „Ég spila fótbolta, nánast allir félagar mínir nota tóbak og félagsskapurinn hefur mikil áhrif.“

„Ég er enn í fótbolta en ég hef enga löngun til að byrja aftur. Ég stefni að því að nota tóbak ekki meir.“

#baggerbogg Tweets