Menntun lögreglunnar á nauðgunarmálum efld

Í nýrri skýrslu Hildar Fjólu Antonsdóttur sem fjallar um viðhorf fagaðila til meðferðar nauðgunarmála innan réttarvörslukerfisins kemur fram að víða er pottur brotinn. Meðal þess sem fjallað er um er hvernig persóna og mannleg reynsla dómara hefur áhrif á lyktir mála, vinnubrögð og viðhorf lögreglu, klámvæðing og úrræðaleysi vegna ungra manna sem beita kynferðisofbeldi án þess að átta sig á því og fleira. Í skýrslunni eru margar tillögur að úrbótum.

Til að mynda er mælt með því að það þurfi að auka símenntunartækifæri dómara, tryggja að reynsluheimur kynjanna endurspeglist í fjölskipuðum dómum og kanna möguleika á að tryggja ákveðna sérhæfingu innan dómstóla.

Sjá fyrri umfjallanir um skýrsluna: „Ójöfn staða sakborninga“ og „Niðurstöður í nauðgunarmálum sagðar vera dómarahappdrætti“.

Ólöf Nordal innanríkisráðherra segir eftirspurn eftir símenntun á öllum stigum, rannsakenda, ákæruvalds og dómara. „Þú nefnir dómara, tækifæri til símenntunar eru auðvitað mikilvæg á öllum stigum þeirra sem koma að þessum málum, rannsakenda, ákæruvalds og dómara. Það sama á auðvitað við um menntunina almennt. Í þessu eins og öðru þarf að skoða heildarsamhengið. Í skýrslunni kemur meðal annars fram eftirspurn eftir símenntun á öllum stigum. Að þessu þarf að huga,“ segir Ólöf.

Þá er mælst til þess að menntun og þjálfun þeirra lögreglumanna sem rannsaka nauðgunar- og kynferðisbrotamál sé efld. Og tryggt verði að rannsókn á nýafstöðnum brotum hefjist þegar í stað þótt kæruskýrsla liggi ekki fyrir. Ólöf segir starfshóp um framtíðarsýn lögreglumanna hafa skilað skýrslu þar sem nýskipaður lögreglustjóri var formaður.

„Nú hefur starfshópur um framtíðarsýn lögreglumanna skilað skýrslu. þar sem Sigríður Björk, lögreglustjóri höfuðborgarsvæðisins, var formaður. Ég á eftir að fá kynningu á henni en við erum að vinna í þessum málum í ráðuneytinu. Nú hefur verið skipaður starfshópur sem skila á tillögum um innihald lögreglunáms. Í honum eru Vilhjálmur Árnason, þingmaður Sjálfstæðisflokksins, Silja Dögg Gunnarsdóttir, þingmaður Framsóknarflokks, og Sigríður Björk, lögreglustjóri höfuðborgarsvæðisins. Markmiðið er að styrkja lögreglunám á Íslandi og það er spennandi verkefni og framtíðarsýn.“ 

Tillögur um úrbætur eru fleiri og margvíslegar. Til að mynda er mælt með því að kynna einkamálaleiðina betur. 

Ólöf segir ráðuneytið munu skoða nánar ýmsar tillögur skýrslunnar. „Almennt um tillögurnar er það að segja að þessi skýrsla er komin út, í henni eru ýmsar tillögur sem ráðuneytið mun skoða nánar og vinna með. Þarna eru tillögur og punktar sem þurfa að þroskast í umræðunni,“ segir Ólöf.