Meirihlutinn gerir breytingar á makrílfrumvarpinu

Þingfundi hefur verið frestað í þrígang í dag. Upphaflega átti hann að hefjast klukkan 11, var þá frestað til klukkan hálftólf og svo frestað aftur til klukkan 12.30. Nú hefur honum svo verið frestað til klukkan hálftvö en formannafundur hófst klukkan 13.

Samkvæmt heimildum fréttastofunnar risu deilur í atvinnuveganefnd í morgun vegna makrílfrumvarpsins. Samkvæmt því átti að kvótasetja makrílinn og úthluta honum til sex ára en nú leggur meirihlutinn til að honum verði úthlutað til þriggja ára, samkvæmt heimildum fréttastofunnar, og hann verði framseljanlegur.

Lilja Rafnhey Magnúsdóttir fulltrúi Vinstri grænna í nefndinni segir þessa breytingu ekki verða til þess að samkomulag takist um afgreiðslu málsins og þar með þinglok.

Minnihlutinn vill að makrílfrumvarpið verði dregið til baka

„Já, það voru kynntar breytingar og þær voru svona eitthvað afturhvarf frá fyrstu hugmyndum en bara langt frá því samkomulagi sem reiknað var með að við værum að ná við stjórnarmeirihlutann. Svo við erum því miður víðs fjarri einhverri niðurstöðu varðandi makrílinn og afdrif þess frumvarps. Þetta var algjörlega óásættanlegt sem lagt var til á fundinum í morgun.“

Stjórnarandstaðan vill að frumvarpið verði dregið til baka og makríl úthlutað til eins ár eins og gert hefur verið undanfarin ár og skipulag á framtíð makrílveiða verði ákveðið samhliða heildarendurskoðun á lögum um stjórn fiskveiða í haust. En Sigurður Ingi Jóhannsson sjávarútvegsráðherra hætti við að leggja fram slíkt frumvarp í vor vegna ágreinings milli stjórnarflokkanna.

Mörg mál bíða afgreiðslu á þingi

„Helsta breytingin er sú að menn eru að taka stórt skref inn í núverandi kvótakerfi þó þeir hægji aðeins gönguna miðað við það sem núverandi frumvarp gerði ráð fyrir,“ segir Lija Rafney.

Ekkert samkomulag er um þinglok en mörg mál bíða afgreiðslu og um sum þeirra er ekki fullkomin eining milli stjórnarflokkanna.

„Þetta útspil var nú ekki til þess að maður fari að sjá fyrir endann á þessu en maður vonar að menn sýni þá skynsemi að draga þetta til baka og fari aftur á þann stað sem okkur fannst við vera komin á.“