Grænlensk börn í hestaferð á Íslandi: „Þau nálgast dýrin á annan hátt“

Fólk Eftirvæntingin lá í loftinu í hesthúsi í Fjárborg þegar tuttugu og níu grænlensk börn sem stödd eru hér á landi fengu að sitja hest, mörg hver í fyrsta sinn. Hópurinn er staddur hér á landi í boði Kalak Vinafélags Íslands og Grænlands og var heimsóknin í hesthúsið einn af fjölmörgum viðburðum sem miðar að því að kynna þau fyrir öðru umhverfi en þau eiga að venjast og kenna þeim að synda.

Mikil kátína var á meðal krakkana yfir reiðtúrnum og ekkert þeirra óttaðist að fara á bak. Bergljót Rist, eigandi Íslenska hestsins sem fylgdi krökkunum í ferðina, segir grænlensku hópana þá einu þar sem enginn er hræddur við hestana. „Ég hef aldrei upplifað neitt barn í þessum hópum sem hefur sýnt hræðslu. Það er svolítið merkilegt. Þau nálgast dýrin á annan hátt.“

Hitta jafnaldra sína á Íslandi

„Þetta er níundi hópurinn sem kemur,“ segir Skúli Pálsson, gjaldkeri Kalak, sem fór með í hestaferðina. 

Börnin koma til Íslands alveg ósynd. „En þau eru orðin synd þegar þau fara heim. Alveg ótrúlegt.“ Börnin dveljast hér í tvær vikur. Þau fara í sund tvisvar á dag og þess á milli sitja þau tíma í grunnskólanum í Kópavogi með jafnöldrum sínum. 

Grænlendingar eru þó ekki allir sammála um nauðsyn þess að senda börnin í sundskóla að sögn Skúla. „Þeir segja bara að detti fólk í sjóinn þá sé það dáið á tveimur til þremur mínútum. En maður hefur heyrt af krökkum sem hafa dottið í sjóinn og eru þremur til fjórum metrum frá landi og geta ekki kraflað sig í land.“ 

Skúli segir atlæti barnanna heima við virðast hafa batnað frá því að fyrsti hópurinn kom hingað til lands. „Þau eru lengra komin, betur klædd og líta betur út. Það er nánast eins og þau séu árinu eldri,“ útskýrir Skúli en börnin koma alltaf úr sjötta bekk og eru því ellefu ára gömul. Þau halda aftur heim til Grænlands næstkomandi miðvikudag.

Skemmtilegast að fara í Tívolí og læra að synda

Grænlensku krakkarnir Maratse Arqe og Hansigne Singertat, 11 ára, fengu bæði að sitja hest í fyrsta sinn í gær. En var það gaman? „Já,“ segja þau bæði og skælbrosa þrátt fyrir að vera örlítið feimin við íslenska blaðamanninn. „Það skemmtilegasta var að fara í Tívolí,“ segir Hansigne en Maratse þótti skemmtilegast að læra að synda.

Krakkarnir segjast báðir kunna alveg að synda núna eftir dvölina þrátt fyrir að hafa verið ósynd við komuna hingað til lands. Þau eru gríðarlega ánægð með heimsóknina en hvorugt þeirra er ákveðið í að koma aftur til Íslands. „Kannski kem ég aftur,“ segir Maratse og Hansigne tekur í sama streng.