20 milljóna króna meðferðarúrræði þótti of dýrt

Tillögu um nýtt úrræði fyrir nemendur í vímuefnavanda var hafnað af borgaryfirvöldum fyrir fjórum árum þar sem hún þótti of kostnaðarsöm. Einn af hugmyndasmiðum tillögunnar segir að áætlaður rekstarkostnaður hafi verið 20 milljónir króna á ári, sem sé aðeins brot af því sem það kostar að missa barn inn í heim fíkniefnanna.

Við höfum í fréttum okkar að undanförnu fjallað um hvað úrræði eru í boði fyrir unga fíkla á Íslandi og í ljós hefur komið að víða er pottur brotinn og margt sem þarf að bæta.

Í dag er þeim einstaklingi sem verður uppvís að neyslu vikið úr skóla tímabundið. Þrátt fyrir að ýmis úrræði bjóðist þessum börnum í dag vill það oft verða þannig að þau hanga heima sér, oft á tíðum eftirlitslaus, sem geri illt verra. Skólastjórar í Breiðholti og Árbæ ásamt þjónustumiðstöðinni í Breiðholti lögðu fram úrræði til að gera kerfið skilvirkara og betra.

„Sú áætlun gekk út á það að ef barn yrði uppvíst um neyslu þá væri það ekki í heimaskóla heldur færi á sérstakan stað. Við sáum fyrir okkur að það gæti verið frístundamiðstöð og þar væru kennarar frá Brúarskóla og frístundaráðgjafar frá Frístundamiðstöðinni. Í gegnum þann stað gæti þá ráðgjöf við aðra tengst. Þangað gætu aðilar frá SÁÁ komið sem og frá öðrum stofnunum. Aðalatriðið var að ef að nemandi yrði uppvís um neyslu þá væri hægt að bregðast við strax. Nemandinn yrði tekinn úr skóla, hann fengi viðeigandi skólaúrræði í aðstæðum sem væri þar sem væri bæði ráðgjöf og meðferð í gangi,“ segir Hákon Sigursteinsson einn höfunda skýrslunnar og sálfæðingur hjá Þjónustumiðstöð Breiðholts.



Hákon segir að árlegur rekstarkostnaður hafi verið áætlaður um 20 milljónir króna ári. 4-6 nemendur gætu verið í meðferðinni hverju sinni sem gæti tekið allt að átta vikur. Vel hafi tekið í tillögurnar af ráðamönnum borgarinnar en fjármögnun ekki fengist engu að síður.

„ Menn hafa verið að leggja tölur eina og einn milljarð króna til 1,2 milljarðar sem myndu tapast með hverju barni. Þá er verið að leggja saman stofnanakostnaður, töpuðum skattpeningum og svo framvegis. 20 milljónir eru ekki mikið í því samhengi.“

Hákon hyggst leggja fram tillögurnar á ný.

„Það er okkar trú sem unnum að þessu módeli á sínum tíma að þetta væri eitthvað sem myndi virka mjög vel,“ segir Hákon.