Inntökupróf í lögfræði: „Þetta er stórt gæðamál fyrir lagadeild Háskóla Íslands”

„Þetta er stórt gæðamál fyrir lagadeild Háskóla Íslands, að stíga þetta skref,” sagði Eyvindur G. Gunnarsson, forseti lagadeildar, í dag eftir að deildin hélt sitt fyrsta inntökupróf.

Deildin hefur verið gagnrýnd fyrir of stóra hópa nemenda og hátt brottfall þar sem slíkt samrýmist ekki alþjóðlegum gæðastöðlum. Um 100 manns þreyttu prófið en ráðgert hafði verið að hleypa 150 nemendum inn í lögfræðina að prófi loknu. Það komast því allir inn sem tóku prófið eins og Vísir greindi frá í dag.

Prófið var í fimm þáttum en prófað var úr upplýsinganotkun, málfærni, lesskilningi, ensku og stærðum og reiknanleika. Prófið stóð frá níu í morgun til um hálf tvö í dag. Stöð 2 tók púlsinn á nýútskrifuðum stúdentum eftir prófið sem virtust sáttir við fyrirkomulagið en þótti prófsetan heldur löng.

Viðtöl við bæði próftaka að prófi loknu og forseta lagadeildar má sjá í meðfylgjandi myndskeiði hér að ofan.