Elstu álftir í Evrópu eru 28 ára og íslenskar

Tvær íslenskar álftir eru þær elstu í Evrópu. Aðra álftina merkti Sverrir Thorstensen, fuglamerkingamaður, sem unga árið 1986, sú er nú kölluð BXM. Hina álftin var merkt af Ólafi Einarssyni, árið 1988 en þá var hún að minnsta kosti tveggja ára, sú er kölluð NXF. Álftirnar eru því 28 ára í ár. Frá þeim var sagt á vefnum 641. 

BXM var merkt við Engivatn á Fljótsheiði í Suður - Þingeyjarsýslu og hefur sést nú í vor í Bárðardal. NXF á ásamt maka sínum óðal við Sigurðarstaðatjörn á Fljótsheiði.

Hefur fylgst með álftinni síðan 1997

Álftirnar eru kallaðar eftir litamerkinu sem þær bera á fótum sér eftir litamerkingar. Árið 1986 var ekki byrjað að nota litmerki og því var BXM ekki litamerkt fyrr en Sverrir hitti á hana aftur sumarið 2013. Þá hafði hann ekki séð álftina frá því hann merkti hana sem unga árið 1986.

„Þegar ég hitti hana aftur var hún pöruð og sjálf með tvo unga,“ segir Sverrir.

Álftinni NXF hefur Sverrir hins vegar fylgst með í mörg ár. „Ég hef verið að sjá hana og taka hana öðru hvoru síðan 1997.“

Með því að taka álftina segist Sverrir eiga við það þegar hann merkir þær og mælir. Það gerir hann frá síðari hluta júlí og fram í ágúst en þá eru álftirnar ófleygar í fjaðrafelli. Hann fer á gúmmíbát út á tjarnir og nær til þeirra og pakkar þeim inn. Innpökkunin er nauðsynleg svo álftirnar séu rólegar á meðan verið er að skoða þær.

Eiga sama maka meðan hann lifir

Misjafnt er eftir álftum hvort þær eru hér á landi allt árið um kring eða fari til Bretlands yfir vetrartímann. Um 20 þúsund álftir fara til Bretlands og eru komnar hingað í mars og apríl tilað verpa. Um eitt til tvöþúsund álftir eru hér á landi allt árið um kring.

Álftir verða kynþroska um fjögurra til sex ára og þær eignast yfirleitt unga á hverju ári eftir það. Þær taka yfirleitt yfir ákveðið óðal sem þær verja árlega fyrir öðrum álftum. Þær eiga sama makann á meðan hann lifir og þar skiptir aldur engu máli. Maki álftarinnar NXF er til dæmis talsvert yngri en hún en þau fara verið par síðan 1997.