Verðum að breyta löggjöf um notkun bílbelta

Ísland verður að breyta löggjöf sinni um notkun öryggisbelta í bílum. Þetta kemur fram í áliti Eftirlitsstofnun EFTA (ESA) þar sem einnig kemur fram að bæta þarf tæknilegt eftirlit úti á vegum með aksturshæfni vöruflutningabifreiða.

Eftirlitsstofnun EFTA (ESA) hefur sent tvö rökstudd álit til Íslands og þar sem hún hvetur stjórnvöld til að gera nauðsynlegar úrbætur í samræmi við ákvæði EES-reglna um umferðaröryggi.

Í fréttatilkynningu ESA segir að fyrra rökstudda álitið varði brot Íslands á að framfylgja tilteknum ákvæðum tilskipunar (91/671/EEC) um skyldu til að nota öryggisbelti í vélknúnum ökutækjum undir 3,5 tonnum  að hámarksþyngd. Í tilskipuninni séu ákvæði um hvenær barn megi sitja í framsæti og nota öryggisbelti ætlað fullorðnum. Segir að gildandi löggjöf á Íslandi uppfylli ekki öryggiskröfur tilskipunarinnar.

„Síðara rökstudda álitið varðar brot Íslands á að framfylgja ákvæðum tilskipunar 2000/30/EC um tæknilegt eftirlit með aksturshæfni vöruflutningabifreiða úti á vegum. Á Íslandi eru tæknilegar skoðanir bifreiða á vegum úti ekki framkvæmdar reglulega eins og krafist er í tilskipuninni. Þá er skyldu til að afhenda ökumönnum skoðunarskýrslu á stöðluðu formi ekki fullnægt. Á Íslandi eru eftirlitsmönnum á vegum heldur ekki tiltæk nauðsynleg gögn við tæknilegt eftirlit, þ.e. nýleg vottorð um aksturshæfni eða nýlegar tæknilegar eftirlitskýrslur.“

Í tilkynningunni segir að íslensk stjórnvöld hafi viðurkennt þá annmarka á innleiðingu og framkvæmd beggja tilskipananna sem ESA benti á í formlegu áminningarbréfi í febrúar 2014. „Þau hafa tilkynnt að gerðar verði nauðsynlegar breytingar á innlendri löggjöf. ESA hefur þó ekki fengið upplýsingar til staðfestingar á slíkum breytingum frá íslenskum stjórnvöldum.

Útgáfa rökstudds álits er annað skrefið í formlegu samningsbrotamáli. Hafi viðkomandi ríki ekki gert viðeigandi ráðstafanir til þess að bregðast við rökstudda álitinu innan tveggja mánaða getur ESA vísað málinu til EFTA-dómstólsins.“