Lagabreytinga þörf ef læknar eiga að geta vísað á kannabis

Lagabreytinga er þörf, eigi læknum að vera heimilt að ávísa á kannabisplöntu í lækningaskyni. Þetta kemur fram í svari heilbrigðisráðherra við fyrirspurn þingmanns Pírata.

Jón Þór Ólafsson, þingmaður Pírata, lagði fram fyrirspurn á þingi í síðasta mánuði varðandi það hvort heilbrigðisráðherra eða önnur heilbrigðisyfirvöld geti heimilað læknum að ávísa kannabisefnum í lækningaskyni. Ef svo sé ekki, hvaða lögum þyrfti þá að breyta.

Það kemur fram í svari Kristjáns Þórs Júlíussonar heilbrigðisráðherra að þegar sé til lyf með markaðsleyfi hér á landi sem inniheldur kannabis. Það er lyfið Sativex, sem er ætlað að draga úr einkennum vegna heila- og mænusiggs. Sativex hefur verið heimilað af Lyfjastofnun og geta læknar á Íslandi því ávísað á það.

Hins vegar telur ráðherra ekki að læknar geti ávísað á sjálfa kannabis-plöntuna í lækningaskyni. Hægt sé að veita undanþágu frá lagaákvæðum um vörslu og meðferð bannaðra ávana- og fíkniefna þegar sérstaklega stendur á. Ávísun læknis á kannabis teljist ekki rúmast innan þessarar þröngu undanþáguheimildar og því sé lagabreytinga þörf, ef læknum á að vera heimilt að gera svo.

Reglulega sprettur upp umræða um hvort heimila eigi neyslu kannabisefna en mörg erlend ríki hafa farið þá leið að leyfa neyslu kannabisefna í lækningaskyni. Síðustu mánuði hafa svo nokkur ríki Bandaríkjanna heimilað frjálsa notkun á kannabisefnum. Kristján Þór hefur sjálfur sagt að breytinga sé þörf í fíkniefnastefnu okkar Íslendinga og að skoða ætti afglæpavæðingu fíkniefna á borð við kannabis.