Íslensk fisksölufyrirtæki uggandi vegna viðskiptabanns

Staðan tvísýn fyrir íslensk fyrirtæki 

Ísland er sem kunnugt er ekki á viðskiptabannlista Rússa sem þeir gáfu út fyrir nokkrum dögum gagnvart nokkrum þjóðum í refsiskyni við stuðning við Úkraínustjórn og hefur mikil áhrif á fiskútflutning til Rússlands. Norðmenn munu vegna bannsins stefna að því að verða mjög fyrirferðamiklir á öðrum mörkuðum í Evrópu sem íslenskir seljendur eru á, aðallega í sölu eldislax og þorsks. Samtök fiskframleiðenda og útflytjenda (SFU) eru þau stærstu hér á landi í fiskvinnslu og sölu án útgerðar. Að þeim eiga um fjörtíu fyrirtæki aðild, mest millistór fyrirtæki. Staðan er tvísýn fyrir þessi fyrirtækin, sagði Jón, formaður SFU í fréttum Stöðvar tvö. 

Auka söluna gríðarlega og lækka verð 

Búist er við að Norðmenn auki sölu sína um 5 til 10 prósent sem geta orðið allt að 80 þúsund ton af fiski sem fari á markað, umfram það sem þeir vanalega selja. Norðmenn selja mikið magn af laxi auk þorsks en íslensku fyrirtækin selja bolfisk sem ódýr lax frá Noregi keppir við. Með auknum umsvifum Norðmanna á Evrópumarkaði getur ferskfiskmarkaður Íslendinga orðið illa úti en Jón segir erfitt að meta hvert tapið gæti orðið. Norðmenn hafa getu til að lækka verð á sínum afurðum mikið sem ekki er hægt að keppa við. 

Gríðarlega erfið samkeppni 

Norskur sjávarútvegur er ríkisstyrktur og segir Jón samkeppnisstöðu Íslands við þessar aðstæður því gríðarlega erfiðar. Hann segir ástandið of viðkvæmt til þess að hann geti mælt með því að sjávarútvegsráðherra hlutist til um málið.