Framkvæmdasjóður ferðamannastaða eyddi ekki of miklu

Útgjöld Framkvæmdasjóðs ferðamannastaða eru innan fjárheimilda, þvert á það sem segir í nýútkominni skýrslu um fjárreiður ríkissjóðs á fyrri hluta ársins. Þetta kemur fram í frétt á heimasíðu stjórnarráðsins.

Þar segir að um miðjan maí hafi ríkisstjórnin samþykkt að veita ríflega 380 milljónum króna til uppbyggingar og verndaraðgerða á ferðamannastöðum á þessu sumri. Um var að ræða sérstaka úthlutun vegna verkefna sem talin voru sérstaklega brýn vegna verndunar náttúru og öryggissjónarmiða.

Ennfremur segir að ekki sé tekið tillit  til aukafjárveitingarinnar í skýrslunni,  né heldur þeirra tæplega 200 milljóna sem sjóðurinn átti óráðstafaðar frá fyrra ári vegna verkefna sem búið er að úthluta styrkjum til og greiddir eru út eftir framvindu verkefnanna.