Fjögurra flokka meirihlutinn í borginni styrkist

Fylgi allra flokka meirihlutans í borginni utan Samfylkingar hefur aukist ef marka má Þjóðarpúls Gallup.

Af þeim flokkum sem sæti eiga í borgarstjórn styrkja Píratar sig mest, eða um tæp fimm prósentustig. Þannig mælist flokkurinn með 10,6 prósenta fylgi. Halldór Auðar Svansson, fulltrúi Pírata í borgarstjórn, segir þetta vissulega ánægjulega niðurstöðu.

„Þetta sýnir að það virðist fara okkur vel að axla ábyrgð í borgarstjórn og taka þátt í meirihlutasamstarfi.“ Píratinn segir það greinilegt að flokkurinn eigi sterkan og stóran stuðningshóp en viðurkennir að hann hafi ekki skilað sér nógu vel á kjörstað í vor.

Nafni hans Halldórsson, oddviti sjálfstæðismanna í borgarstjórn, telur að fylgi Sjálfstæðisflokks muni aukast á kjörtímabilinu en samkvæmt könnuninni stendur flokkurinn nánast í stað og er með 25,3 prósenta fylgi.

„Ég reikna með því að það eigi eftir að komast betur á framfæri því sem við höfum verið að leggja áherslu á og gera athugasemdir við.“

Björt framtíð myndi ná inn einum manni til viðbótar í borgarstjórn ef gengið yrði til kosninga nú en fylgi flokksins mælist nú 17,7 prósent. Þetta er aukning um tvö prósent en Vinstri hreyfingin – grænt framboð eykur fylgi sitt til jafns við Bjarta framtíð. Framsókn og flugvallarvinir myndu hins vegar missa annan fulltrúa sinna í borgarstjórn. Flokkurinn mælist með 5,6 prósenta fylgi sem er fimm prósentustiga lækkun frá kosningum.

Samfylkingin mælist með minna fylgi en í kosningum, eða 28,9 prósent miðað við 31,9 prósent í vor. Dagur B. Eggertsson borgarstjóri segist ánægður með niðurstöðurnar.

„Samstarfsflokkar okkar eru allir að bæta við sig. Það er mjög ánægjulegt. Við mælumst aðeins lægri en í kosningum en erum áfram stærsti flokkurinn og megum vel við una. Meirihlutinn í heildina er tæp sjötíu prósent,“ segir borgarstjórinn. „Allavega virðist þessi könnun benda til þess að við séum að gera eitthvað rétt.“