Lögreglan á Höfn tilheyrir Austurlandi til bráðabirgða

Lögregluembættið á Hornafirði verður til bráðabirgða undir lögreglustjóranum á Austurlandi. Þetta kemur fram í fréttatilkynningu frá innanríkisráðuneytinu. Nýr innanríkisráðherra, Ólöf Nordal, ætlar að fara yfir skipan lögregluumdæma landsins og mun fara yfir þessa reglugerð frá 4. desember.

Ákvörðun Sigmundar Davíð Gunnlaugssonar um að sveitarfélagið Hornafjörður teljist til umdæmis lögreglustjórans á Austurlandi hefur vakið hörð viðbrögð. Reglugerðin var undirrituð af Sigmundi þann fjórða desember síðastliðinn, sama dag og tilkynnt var að Ólöf Nordal yrði næsti innanríkisráðherra.

Í fréttatilkynningu frá innanríkisráðuneytinu um reglugerð ráðherra er greint frá því að sveitarfélagið Hornafjörður teljist til umdæmis lögreglustjórans á Austurlandi þar til úttekt á rekstrarforsendum lögreglunnar á Austurlandi hefur farið fram.

Samkvæmt Jóhannesi Þór Skúlasyni, aðstoðarmanni Sigmundar, var ástæða þess sú að áhyggjuraddir höfðu heyrst frá lögreglunni á Austurlandi og sveitarstjórnarmönnum á svæðinu.

„Rekstrargrundvöllur lögreglunnar á Austurlandi hefur ekki verið nógu sterkur. Að mati heimamanna skipti það miklu máli að það samstarf sem hefur verið milli lögregluembætta á Höfn og á Austurlandi sé skoðað nánar og rekstrarforsendurnar endurmetnar,“ segir Jóhannes Þór.

Því verður nú ráðist í það að skoða rekstur lögreglunnar á Austurlandi. Þegar því endurmati verður lokið mun ákvörðun verða tekin hvort lögreglan á Höfn muni tilheyra Suðurlandi eða Austurlandi.

Gunnar Þorgeirsson, formaður Samtaka sunnlenskra sveitarfélaga, segir ákvörðun Sigmundar hafa komið á óvart. Unnur Brá Konráðsdóttir, formaður allsherjarnefndar Alþingis, telur að það eigi að draga reglugerð Sigmundar til baka.

Björn Ingi Jónsson, bæjarstjóri Hornafjarðar, hefur sent þingmönnum kjördæmisins bréf þar sem hann undrast þessa skipan. Bæjarstjóri hafi fengið fundarboð hjá lögreglustjóranum á Suðurlandi því hann hafi viljað hitta alla framkvæmdastjóra sveitarfélaga í sínu umdæmi. Vonast Björn Ingi eftir að þessi ákvörðun verði endurskoðuð.

„Nýr lögreglustjóri Suðurlands hefur komið hingað og hitt starfsmenn lögregluumdæmisins á Höfn og í gangi er skipulagsvinna þessu tengd,“ segir Björn Ingi.

„Í síðustu viku fékk ég fundarboð frá lögreglustjóra Suðurlands um að koma til fundar við hann í næstu viku þar sem hann ætlaði að hitta alla framkvæmdarstjóra sveitarfélaga í sínu umdæmi.“

Ný lög um skipan lögregluumdæma lögreglustjóra voru samþykkt þann 14. maí síðastliðinn. Þar er lögregluumdæmum fækkað úr 24 í níu og lögreglustjórum fækkað úr fimmtán í níu. Lögregluumdæmin eru Höfuðborgarsvæðið, Vesturland, Vestfirðir, Norðurland vestra, Norðurland eystra, Austurland, Suðurland, Vestmannaeyjar og Suðurnes.

Lögregluembættið á Höfn hefur frá árinu 2007 verið í samstarfi við lögregluna á Austfjörðum. Sú ákvörðun Sigmundar felur því ekki í sér neinar breytingar frá fyrri högum lögreglunnar í sveitarfélaginu Hornafirði.

Ekki náðist í Sigmund sem var erlendis í gær.