Fataskápurinn: Þægindin skipta mestu máli

27. október 2014 15:00

Vaka Alfreðsdóttir, nemi í Myndlistaskóla Reykjarvíkur og starfsmaður í Spúútnik leyfði lífinu að líta inn í fataskápinn sinn og deildi með okkur uppáhalds hlutunum sínum.

„Fatastíll minn er frekar afslappaður. Ég pæli þó mikið í fatnaði og elska að kaupa mér ný föt. Ég er mikið í því að blanda saman gömlu og nýju. Fell oft fyrir hippalegum flíkum, fatnaði og hlutum í boho-stíl og flíkum með etnísku ívafi."

„Ég er lítið að spá í trendum og kaupi bara það sem mér finnst flott. En umfram allt skipta þægindin mig mestu máli þegar kemur að fatavali og ég nenni afar sjaldan í hælaskó."

„Mér þykir langskemmtilegast að gramsa í vintage-búðum og finna einstakar flíkur sem ekki margir eiga og er því heppin að vinna í einni slíkri. Svo er alltaf gaman að komast til útlanda í búðir sem eru ekki hér heima. Það eru nokkrar búðir sem ég held mest upp á. Á Íslandi eru það Spúútnik, Nostalgía og Aftur. Erlendis eru það til dæmis Monki og Urban Outfitters".

„Ég hef gaman af skartgripum og finnst handgert skart vera fallegast, helst úr ekta málmum eða náttúrulegum efnum. Ég geng alltaf með nokkra hringi og Kríu hálsmenin mín. Svo smelli ég stundum í mig eyrnalokkum ef mig langar að vera fín."

Kímonó frá Japan

Ég held mikið upp á þennan kímonó. Hann er vintage, keyptur í Japan og er úr ekta silki. Ég fékk hann lánaðan hjá frænku minni fyrir svolítið löngu og ég held að hún sé ekkert að fara að fá hann aftur.

Uppáhalds hatturinn

Var lengi búin að leita að flottum hatti þegar ég fann þennan. Hann er handgerður af bandarískum hönnuði, Janessa Leone, og fæst í Jör. Hann passar við allt og ég hef notað hann mikið. Núna langar mig í brúnan!

Fallegur rúskinnsjakki

Var að fá þennan fallega rúskinnskögurjakka í Spúútnik. Hef varla farið úr honum síðan að ég keypti hann.

Kríu hálsmenið mitt

Ég er alltaf með Kríu hálsmenin mín. Fyrst átti ég eitt hálsmen frá því merki en nýlega bættist annað í safnið. Finnst flott að hafa nokkur saman. Þau fást í versluninni Aftur.