Stjórnarmaður í Orkuveitunni býst við skýringum á notkun á Þingvallabústað

„Ég vissi að það væri bústaður þarna einhvers staðar en mér var aldrei sagt að það væri bústaður sem forstjórinn einn hefði aðgang að,“ segir Kjartan Magnússon, stjórnarmaður í Orkuveitu Reykjavíkur.

Kjartan hefur setið í stjórn OR fyrir Sjálfstæðisflokkinn frá árslokum 2007. Hann segir upplýsingar sem fram komu í Fréttablaðinu í liðinni viku um svokallaðan forstjórabústað OR í landi Nesjavalla við Þingvallavatn hafa komið sér í opna skjöldu. Hann hafi heyrt um bústaðinn og talið að hann væri einn þeirra sem starfsmannafélag OR ræður yfir.

„Það var ekkert talað um að forstjórinn hefði eitthvað með bústaðinn að gera; réði honum og hefði hann fyrir sig. Maður hafði á tilfinningunni að þetta hús væri í niðurníðslu og að hruni komið. Svo sá maður í fréttunum að þetta er að minnsta kosti nothæft,“ segir Kjartan. Eins og sést hefur í umfjöllun Fréttablaðsins virðist bústaðurinn í fyrirtaks ástandi.

Fram kom í svörum Eiríks Hjálmarssonar, upplýsingafulltrúa Orkuveitunnar, til Fréttablaðsins í liðinni viku að forstjóri fyrirtækisins hefði ráðstöfunarrétt yfir Þingvallavatnsbústaðnum. Síðar sagði Bjarni Bjarnason forstjóri að það væri ekki rétt. Sjálfur hefði hann ekki notað bústaðinn lengi en að líklega hefðu einhverjir framkvæmdastjórar hjá Orkuveitunni dvalið í húsinu.

„Hann var síðast notaður seinni part júlímánaðar en eins og fram hefur komið þá var forstjórinn ekki þar á ferð,“ svarar Eiríkur ítrekaðri fyrirspurn Fréttablaðsins um hverjir hafa notað forstjórabústaðinn og hvenær.

Aðspurður segist Kjartan eiga von á því að gefnar verði skýringar á notkun hússins á vettvangi stjórnar Orkuveitunnar.

Fram hefur komið að til standi að leggja af sumarhúsabyggð í Nesjavallalandinu, meðal annars vegna vatnsbóls sem þar er. Bjarni forstjóri hefur sagt við Fréttablaðið að verði niðurstaðan það verði bústaður Orkuveitunnar fyrstur til að hverfa.