Segir aðgerð lögreglu í Hraunbæ ekki refsiverða

Rannsókn Ríkissaksóknara á aðgerðum lögreglu í skotárásinni í Hraunbæ í desember síðastliðnum segir ekkert benda til refsiverðrar háttsemi lögreglumannanna. Sævar Rafn Jónasson, íbúi í fjölbýlishúsinu við Hraunbæ 20, lét lífið vegna skotsára sem hann hlaut í átökunum.

Lögregla var kölluð á vettvang aðfaranótt 2. desember í fyrra vegna tilkynningar nágranna um hávaðasama tónlist úr íbúð Sævars, auk þess sem hár hvellur hafði heyrst þaðan. Í greinargerð Ríkissaksóknara kemur fram að nágranninn gaf lögreglu upp nafn annars manns og var því nafni flett upp í upplýsingakerfum lögreglu. Sá maður var ekki skráður fyrir skotvopni og ekkert brot skráð á hann í málaskrá lögreglu.

Hefði nafni Sævars hins vegar verið flett upp, hefðu upplýsingar legið fyrir um að hann hlaut fangelsisdóm í Noregi árið 1986 fyrir að reyna að skjóta lögreglumann með skammbyssu.

Í greinargerðinni segir einnig að varðandi upphafsaðgerðir lögreglu hafi Ríkissaksóknari fyrst og fremst skoðað atriði sem sneru að aðkomu lásasmiðs sem kallaður var til.

Í skýrslu lásasmiðsins segir að lögregla hafi ekki nefnt við hann að Sævar væri hugsanlega vopnaður byssu og að lásasmiðurinn hafi ekki verið klæddur í skothelt vesti. Þó er tekið fram í greinargerðinni að lögreglan taldi að Sævar væri látinn, en reynt hafði verið að ná sambandi við hann í um korter áður en lásasmiðurinn kom á staðinn.

Sævar hóf strax að skjóta á lögreglu þegar opnað var inn í íbúðina. Því er lýst í skýrslum lögreglumanna að þeir hafi ítrekað kallað til Sævars að leggja niður vopnið og ræða við þá. Eftir að gasvopnum var beitt án árangurs fóru sérsveitarmenn inn í íbúðina.

Lögregla hleypti af fjórum skotum inni í íbúðinni eftir að Sævar hóf skothríð úr svefnherbergi sínu. Öll fjögur skotin komu úr sömu byssunni og hæfðu tvö þeirra Sævar. Þau eru talin eiga jafnan hlut í því að draga hann til dauða.

Samkvæmt greinargerðinni telur Ríkissaksóknari að lögregla hefði ekki getað beitt vægari vörnum við skotum Sævars og að verkið sé því refsilaust.