Róðukross á nær fimm milljónir til sölu

Róðukrossinn sem Sigurður Pálmason, eigandi Safnaramiðstöðvarinnar, hengdi upp í verslun sinni í gær er talinn vera frá 13. til 15. öld, að hans sögn. Sá sem vill eignast gripinn, sem er 80 cm að hæð og 55 cm á breidd, þarf að greiða fyrir hann 4,8 milljónir króna.

„Þessi kross er úr Reykjakirkju í Tungusveit sem ég held að hafi verið lögð niður á 19. öld en kirkjan var í einkaeigu. Krossinn, sem hugsanlega var búinn að vera í kirkju frá því fyrir siðaskipti, komst í eigu íslenskrar fjölskyldu þegar kirkjan var lögð niður og sama fjölskylda hefur varðveitt hann hingað til. Nú vill fjölskyldan hins vegar selja krossinn,“ segir Sigurður og bætir því við að hann sé í mjög góðu ástandi.

„Ég hef ekki áður fengið svona þjóðlegan merkisgrip til sölu,“ leggur hann áherslu á.

Sigurður segir starfsmann frá Minjastofnun hafa komið í verslunina til sín í gær í þeim erindagjörðum að vekja athygli á því að ekki megi flytja eða selja forngripi úr landi. „Mér var kunnugt um það að ekki mætti selja krossinn úr landi og í gær var mér tjáð að Þjóðminjasafnið hefði forkaupsrétt að krossinum.“

Anna Lísa Rúnarsdóttir, sviðsstjóri rannsókna- og varðveislusviðs á Þjóðminjasafninu og settur þjóðminjavörður, kvaðst í gær enn ekki hafa skoðað krossinn. „Í lögum um Þjóðminjasafn er ákvæði um friðun kirkjugripa og við erum með skrá sem gerð var fyrir mörgum árum yfir friðaða kirkjugripi. Þjóðminjasafnið hefur forkaupsrétt að kirkjugripum úr einkaeigu.“

Að sögn Önnu Lísu mun Þjóðminjasafnið fara yfir viðeigandi gögn og meta stöðuna. „Það veltur á þeim upplýsingum sem við finnum um hvaðan þetta er fengið hvað þetta tekur langan tíma. Mögulega gæti þetta legið mjög ljóst fyrir. Miðað við myndina