Segir lög á verkfall Herjólfsmanna algjörlega óásættanleg

„Okkur finnst það bara ömurlegt, ég veit ekki hvað ég á að segja annað,“ segir Jónas Garðarsson, framkvæmdarstjóri Sjómannafélags Íslands, um lög sem samþykkt voru í gær á Alþingi um að fresta verkfallsaðgerðum undirmanna á Herjólfi til 15. september.

„Þetta er algjörlega óásættanlegt,“ segir Jónas.

Verið sé að fara fram á sömu kjarabætur fyrir fólkið á Herjólfi og aðrir sjómenn sem starfa hjá Eimskipafélagi Íslands séu með.

Það sé ansi langt gengið að vilja ekki borga þessum hópi starfsfólks eins og öðrum sem vinna á skipum félagsins.

Starfsmenn Herjólfs séu ekki að fara fram á sömu heildarlaun heldur fara þeir fram á samskonar hækkanir og aðrir hafa fengið. Samningur Herjólfsmanna er öðruvísi en hinna og býður ekki upp á jafn há heildarlaun. „Samningurinn býður því upp á lægri heildarlaun en hinir fá, þó svo að gengið yrði að kröfunum,“ segir Jónas.