Lög á verkfall Herjólfsmanna samþykkt

Frumvarp Hönnu Birnu Kristjánsdóttur innanríkisráðherra um að fresta verkfallsaðgerðum undirmanna á Herjólfi til fimmtánda september, var samþykkt á Alþingi upp úr miðnætti með 29 atkvæðum gegn 13, en fimm sátu hjá.

Fundi um málið var ítrekað frestað í gærkvöldi, en hann hófst loks um ellefu leytið. Þá hafði umhverfis- og samgöngunefnd fjallað um frumvarpið og meðal annars kallað til Jónas Garðarsson formann Sjómannafélags Íslands og Gylfa Arnbjörnsson framkvæmdastjóra Alþýðusambandsins.

Árni Páll Árnason þingmaður Samfylkingarinnar mælti fyrir áliti minnihluta nefndarinnar og sagðist ekki telja efnislegar forsendur til að fallast á samþykkt laganna. Hann sagðist óttast fordæmisgildi þeirra og benti á að verkfall framhaldsskólakennara og stjórnenda í framhaldsskólum stæði yfir, og yfirvofandi væru verkfallsaðgerðir starfsmanna ISAVIA.

Á heimasíðu Herjólfs segir að skipið muni sigla tvær ferðir til Landeyjahafnar í dag.