„Það hefur ekki staðið á okkur að útvega þessar tunnur“

Félagsstofnun stúdenta (FS) þarf að óska eftir fleiri sorpílátum í sorpgeymslu á milli Sæmundargötu 18 og 20. Þetta segir Eygerður Margrétardóttir, deildarstjóri umhverfis- og úrgangsstjórnunar Reykjavíkurborgar, en sorpgeymslan er yfirfull og hefur ástandið verið hræðilegt í meira en mánuð að sögn íbúa í húsunum tveimur.

„Það fóru starfsmenn frá okkur þangað í morgun og aðkoman var önnur en á myndunum, ég veit reyndar ekki hvers vegna,“ segir Eygerður, en Rebekka Sigurðardóttir hjá FS sagði í samtali við Vísi fyrr í dag að notast væri við bráðabirgðatunnur í sorpgeymslunni þar sem fullnægjandi sorpgámar væru ekki til hjá sorphirðunni.

„Það hefur ekki staðið á okkur að útvega þessar tunnur,“ segir Eygerður og bætir því við að það sé FS sem fari með þessi mál fyrir hönd stúdenta og geti óskað eftir þeim fjölda sorptunna sem þurfi og valið á milli tíu eða tuttugu daga hirðutíðni.

„Ég var að skoða þetta og sá að í þessum húsum eru samtals 133 íbúðir. Við þessar íbúðir eru fjögur ker skráð hjá okkur og tíu tunnur. Það er alveg ljóst að FS hefur ekki óskað eftir nægilega miklum fjölda íláta fyrir þessar íbúðir.“

0,16 tunnur of lítið

Eygerður segir eitt ker jafngilda 2,75 tunnum en við húsin tvö í Sæmundargötu séu 0,16 tunnur á hverja íbúð. „Íbúar greiða eftir rúmmáli og eftir hirðutíðni. Í svona nýjum íbúðum er yfirleitt gert ráð fyrir 0,75 tunnum á hverja íbúð og því er ljóst að 0,16 tunnur á hverja íbúð er of lítið. En það hefur verið óskað eftir þetta mörgum lítrum á hvern íbúa og við höfum brugðist við því.“

Eygerður segir að af myndunum að dæma sé hægt að koma fyrir fleiri ílátum á staðnum en ekki hafi verið óskað eftir því.

„Þetta er greinilega einhver byrjunarvandi. Við höfum sett okkur í samband við starfsfólk FS sem fer með þessi mál og falast eftir upplýsingum um hversu mörg tunnuígildi þau telja að henti fyrir hverja íbúð á þessum stað. Við búumst við að málið leysist þegar sú niðurstaða liggur fyrir.“