Guðlaug hættir sem formaður BHM

Guðlaug Kristjánsdóttir hefur ákveðið að láta af störfum sem formaður Bandalags háskólamanna eftir rúmlega sex ára starf. Í bréfi til starfsmanna segir hún nú tímabært að stíga til hliðar og hleypa nýjum að.

„Í vor sem leið var ég endurkjörin sem formaður BHM og var þar um að ræða síðustu tvö árin af átta í samræmi við lög bandalagsins.

Í síðustu sveitarstjórnarkosningum leiddi ég lista nýs framboðs í heimabæ mínum, Hafnarfirði. Niðurstöður kosninganna urðu með þeim hætti að í dag er ég forseti bæjarstjórnar og annar af oddvitum nýs meirihluta. Í samráði við stjórn BHM var í kjölfarið ákveðið að láta reyna á möguleika þess að gegna þessum tveimur hlutverkum samhliða. Það fyrirkomulag þykir mér nú vera fullreynt og hef því komist að fyrrgreindri niðurstöðu, sem ég hef þegar kynnt stjórn bandalagsins.

Staðan innan BHM er góð. Stjórnin er komin langt á veg með framfylgd starfsáætlunar ársins. Innviðir bandalagsins hafa eflst til muna á undanförnum árum, verkefnum fjölgað og grundvöllur starfsins okkar breikkað. Ég lít sátt yfir farinn veg, stolt og þakklát fyrir það sem við höfum áorkað. Samstaðan innan okkar raða er mér þar efst í huga, enda höfum við séð það skýrt á síðustu misserum hvers konar samlegðaráhrifum er hægt að ná með öflugu samstarfi. Ég hvet ykkur til að halda áfram að rækta þann styrk, af alúð og einbeittum hug, og missa ekki sjónar á sameiginlegu takmarki heildarinnar.

Sú reynsla sem ég hef öðlast í starfi mínu sem formaður BHM er ómetanleg. Ég hef notið þeirrar gæfu að hafa djúpstæða trú á því erindi sem bandalagið hefur fram að færa, jafnt í samfélagsumræðu og sem aðili á íslenskum vinnumarkaði. Ég er sannfærð um að öflug uppbygging og nýting þekkingar er forsenda framfara á öllum sviðum samfélagsins og mun áfram beita mér fyrir eflingu menntunar og fagmennsku, þótt á öðrum vettvangi verði.“

Guðlaug þakkar í bréfinu félagsmönnum, forystu- og samstarfsfólki jafnt innan sem utan BHM samfylgdina af heilum hug og óskar Bandalagi háskólamanna áframhaldandi velgengni, styrks og uppbyggingar á komandi árum.