Áhyggjur af auðveldu aðgengi að fíkniefnum

Bæjarfulltrúi á Selfossi hefur miklar áhyggjur af fíkniefnaneyslu unglinga á staðnum og hversu auðvelt sé að nálgast fíkniefni. Hann segist heyra það að það sé mun auðveldara fyrir unglinga að kaupa hass heldur en bjórkippu í áfengisverslun staðarins.

Yfirlögregluþjónn á staðnum segir að það sé ekki kostur að gefast upp gegn fíkniefnavandanum.

Magnús Hlynur  Hreiðarsson ræddi við Helga Sigurð Haraldsson, bæjarfulltrúa Árborgar, og Odd Árnason, yfirlögregluþjón á Selfossi í hádegisfréttum Bylgjunnar.

Helgi segist hafa áhyggjur af stöðu fíkniefnamála í Árborg, þegar börn og unglingar eru annars vegar og hversu auðvelt sé fyrir þennan hóp að kaupa fíkniefni.

„Ég hef áhyggjur af því sem ég heyri í kringum mig, bæði hjá unglingum og öðrum, að það sé alltaf að aukast framboð af fíkniefnum og aðgengi að því sé mjög auðvelt. Það virðast vera fleiri aðilar sem eru að bjóða upp á þetta og eru á ferðinni. Ég heyrði síðast í gær sögu af því að það væri auðveldara fyrir unglinga að ná sér í gras eða fíkniefni heldur að ná sér í bjórkippu. Hann væri fljótari að ná sér í fíkniefninn.

„Miðað við það sem ég heyri í kringum mig þá finnst mér málið alvarlegt og að það þurfi að grípa til aðgerða og ræða það í samfélaginu, hjá foreldrum, forráðamönnum og öðrum,“ segir Helgi.

„Við erum að fást við málaflokkinn eins og við mögulega getum,“ segir Oddur Árnason. „Sannarlega vildum við hafa meiri mannskap til að takast á við þetta og við vitum að neysla hefur aukist. Ég er reyndar ekki sammála því sem hefur komið fram að það séu allir að reykja hass. Það er ekki svoleiðis.“

„Að mínum huga er það ekki kostur í stöðunni og ég hvet þá sem hafa eitthvað til málanna að leggja að standa í lappirnar og takast á við verkefnið. Þó það sé erfitt þá er það ekki kostur í stöðunni hvorki gagnvart börnunum sem að fást við þessi vandamál eða foreldra þeirra, að gefast upp,“ segir Oddur.