Fagnar lúpínunni á höfuðborgarsvæðinu

Helgi Gíslason, framkvæmdastjóri Skógræktarfélags Reykjavíkur fagnar því hvað lúpínan hefur dreift sér mikið á höfuðborgarsvæðinu því plantan sé mjög góð uppgræðsluplanta.

Alaskalúpína er 30 til 90 sentimetra há fjölær jurt af ertublómaætt. Hún ber blá eða fjólublá blóm. Lúpína hefur lengi verið notuð til landgræðslu hér á landi með góðum árangri. Blóm plöntunnar eru mjög áberandi þessa daga en plantan er blómstrandi í rúmlega mánuð á þessu árstíma.

Helgi er hrifin af lúpínunni á höfuðborgarsvæðinu sem uppgræðsluplöntu.

„Hún hefur staðið hér fyrir umfangsmikilli uppgræðslu en það var reyndar ágætis áminning, sem við fengum þegar gosin voru fyrir nokkrum árum síðan, þá fengum við gosösku inn á heimili okkar í bænum og það var svona upprifjun á því hvernig þetta var fyrir 35 árum síðan þegar hér voru uppblástursvæði og moldargusurnar gengu um bæinn, lúpínan hefur náð að stöðva það algjörlega,“ segir Helgi og bættirþví við að hún hafi unnið það verkefni, sem hún átti að gera og bætir við.

„Það er náttúrulega eðli allra plantna að dreifa úr sér en lúpínan hefur þann eiginleika eftir ákveðinn tíma byrjar hún að hörfa eftir að hafa byggt upp góðan jarðveg, það að vísu tekur langan tíma en hún mun gera það.“

Helgi sýndi nokkra hektara svæði í Heiðmörk þar sem lúpínan hefur hörfað eftir að hafa grætt svæðið upp en það er frá 1950.

„Þetta var uppblásið svæði þar sem var bara urð og grjót eftir nema hér var örlíltil gróðurtorfa, sem er hér rétt hjá okkur. Þetta hefur lúpínan grætt upp, skilað hér af sér góðu jarðvegi, hér er hún nánast farinn, það er ein og ein planta eftir en komið blómlendi og graslendi sem að  ætti að sjást hér vel,“ segir Helgi.

Þannig að hér vann lúpínan gott hlutverk?

„Já, já, hún gerði það hlutverk, sem menn hafa alltaf búist við af henni“.