Gylfi heldur til náms í lögregluháskóla FBI

Gylfi H. Gylfason, lögreglufulltrúi í greiningardeild ríkislögreglustjóra, mun næstu þrjá mánuði stunda nám við lögregluháskóla FBI (FBI National Academy) í Quantico í Virginíu-ríki í Bandaríkjunum.

Í tilkynningu frá ríkislögreglustjóra segir að námið sé ætlað stjórnendum í lögreglu og helsta markmið þess sé að auka þekkingu nemenda og gera þá betur í stakk búna til að takast á við flókin löggæsluverkefni og tryggja góð alþjóðleg samskipti löggæslustofnana á heimsvísu.

„Nám þetta er í samvinnu við háskólann í Virginíufylki. Lögregluháskóli FBI er þekktur á alþjóðavettvangi fyrir þetta nám en þar er meðal annars kennd stjórnun, aðferðafræði við rannsóknir afbrota, afbrotafræði og margt fleira, auk líkamsþjálfunar,“ segir í tilkynningunni.

Gylfi er níundi íslenski lögreglumaðurinn sem leggur stund á nám við skólann, en áður hafa eftirtaldir lögreglumenn lokið þessu námi:

• Ómar Smári Ármannsson aðstoðaryfirlögregluþjónn hjá lögreglustjóra höfuðborgarsvæðisins (1985)
• Guðmundur Guðjónsson fyrrv. yfirlögregluþjónn hjá ríkislögreglustjóra (1993)
• Gunnar Jóhannsson lögreglufulltrúi hjá lögreglustjóranum á Akureyri (1995)
• Karl Steinar Valsson aðstoðaryfirlögregluþjónn og tengslafulltrúi Íslands hjá Europol (1999)
• Jón F. Bjartmarz yfirlögregluþjónn hjá ríkislögreglustjóra (2000)
• Berglind Kristinsdóttir lögreglufulltrúi hjá sérstökum saksóknara (2004)
• Sveinn Ingiberg Magnússon yfirlögregluþjónn hjá sérstökum saksóknara (2007)
• Kristján Ólafur Guðnason aðstoðaryfirlögregluþjónn hjá lögreglustjóra höfuðborgarsvæðisins (2012)