Lyfjakostnaður sjúklinga lækkar

Þak á árlegum hámarkskostnaði lyfjanotenda mun lækka um 10% þann 1. janúar næstkomandi samkvæmt nýrri reglugerð heilbrigðisráðherra.

Hámarkskostnaðurinn fer úr 69.416 krónum hjá almennum notendum í 62.000 krónur, og hjá börnum, lífeyrisþegum og fólki yngri en 22 ára úr 46.277 krónum í 41.000 krónur. Þetta kemur fram í tilkynningu frá velferðarráðuneytinu.

Fjárhæðir afsláttarþrepa í lyfjagreiðslukerfinu lækka einnig en lyfjagreiðslukerfið miðar við að notendur borgi lyf sín að fullu þar til ákveðinni fjárhæð er náð. Eftir það greiða sjúkratryggingar 85% af verði lyfjanna á móti 15% hlutdeild sjúklings.

Full greiðsluþátttaka almenns lyfjanotanda miðast nú við 24.075 kr. en lækkar niður í 22.000 kr. og hjá börnum, og lífeyrisþegum fer þessi fjárhæð úr 16.050 kr. í 14.500 kr.