Sprengja í innflutningi á LSD: 8000 skammtar á átta mánuðum

Tollverðir hafa haldlagt 7996 skammta af LSD það sem af er þessu ári. Er það mun meira magn heldur en haldlagt hefur verið undanfarin ár samkvæmt upplýsingum frá Tollstjóra. LSD-skammtarnir hafa borist til landsins með póstsendingum.

Raunar er magnið í ár meira en árin fjögur á undan til samans. Hald var lagt á 4.488 skammta árið 2011 en mun færri 2010 (501), 2012 (10) og 2013 (715).

Haldi þessi þróun áfram er það mikið áhyggjuefni að sögn Tollstjóra, því um er að ræða ofskynjunarefni og geta sál- og geðrænar afleiðingar verið skelfilegar eins og lesa má um á Vísindavefnum.

Auk LSD skammtana hafa tollverðir haldlagt 49 grömm af LSD-dufti það sem af er árinu. Einnig hafa verið haldlögð, en í mun minna magni, e-duft, og -töflur, hass, maríjúana, metamfetamín, kannabisfræ, amfetamín og kókaín. Jafnframt nokkurt magn stera í föstu og fljótandi formi.  Málin hafa verið kærð til lögreglunnar á höfuðborgarsvæðinu jafnóðum og þau hafa komið upp.

Tollstjóri minnir á fíkniefnasímann 800-5005. Í hann má hringja nafnlaust til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann