Fjölmenn mótmæli í Róm í dag

Stærsta verkalýðsfélag Ítalíu, CGIL, boðaði til mótmæla í Róm í dag áforma ríkisstjórnar landsins um breytingar á vinnulöggjöf.

Talið er að hátt í ein milljón manna hafi tekið þátt í mótmælunum.

Matteo Renzi, forsætisráðherra Ítalíu, hefur boðað nýjar reglur sem eiga meðal annars að gera fyrirtækjum auðveldara að reka starfsfólk.

Þessu var mótmælt í dag auk þess sem mótmælendur létu í ljós óánægju sína með atvinnuleysi ungs fólks. Það er nú 44,2% og hefur aldrei verið hærra.

Í frétt BBC kemur fram að ekki er eining innan flokks forsætisráðherrans um boðaðar breytingar á vinnulöggjöfinni en aðstoðarforsætisráðherrann varði aðgerðirnar og sagði þær eigi að stuðla að sköpun nýrra starfa.

Efnahagur Ítalíu hefur farið stöðugt versnandi síðastliðin ár og atvinnuleysi aukist mjög.