Telja Dag hafa notað bifreið borgarstjóra í leyfisleysi

Í borgarstjóratíð Jóns Gnarr hafði staðgengill hans, Dagur B. Eggertsson, núverandi borgarstjóri, afnot af bíl borgarstjóra. Borgarráðsfulltrúar Sjálfstæðisflokksins segja að Dagur hafi notið bílafríðinda hjá borginni umfram aðra borgarfulltrúa, þrátt fyrir að hafa haft afnot af tveimur öðrum bifreiðum án þess að formleg ákvörðun hafi verið tekin um það á þar til bærum vettvangi. Þetta kemur fram í bókun borgarráðsfulltrúa Sjálfstæðisflokks en þetta er í annað sinn sem slík bókun er lögð fram.

Í bókuninni segir:

„Margir aðrir borgarfulltrúar eru mikið á ferðinni í opinberum erindagjörðum án þess að þeim standi til boða afnot af bifreiðum borgarinnar eins og gerst hefur í þessu tilviki.“

Þá kemur jafnframt fram að nauðsynlegt sé að skýra reglur um bílafríðindi kjörinna fulltrúa og að komið verði í veg fyrir notkun þeirra á bifreiðum Reykjavíkurborgar án þess að skýr heimild liggi fyrir um slíkt. Borgarráð óskar því eftir endurskoðun á samgöngusamningi ríkisins og Reykjavíkurborgar.

Bókunina í heild sinni má sjá hér að neðan.

Framlagt svar við fyrirspurn borgarráðsfulltrúa Sjálfstæðisflokksins um notkun borgarfulltrúa á bifreiðum í eigu Reykjavíkurborgar er um margt óljóst. Af svarinu má þó ráða að einn borgarfulltrúi hafi notið bílafríðinda umfram aðra í verulegum mæli. Í svarinu kemur fram að annars vegar hafi borgarfulltrúinn haft afnot af bíl borgarstjóra þegar hann gegndi starfskyldum svokallaðs staðgengils hans og stöku sinnum í ,,opinberum erindagjörðum“ á vegum Reykjavíkurborgar eins og segir í svarinu án þess að það sé skilgreint nánar, en með því hlýtur að vera átt við erindisrekstur sem fellur utan starfsviðs svokallaðs staðgengils. Hins vegar hafi borgarfulltrúanum staðið til boða afnot af tveimur öðrum bifreiðum til slíkra erindagjörða.

Ljóst er að umræddur borgarfulltrúi hefur notið bílafríðinda hjá borginni umfram aðra borgarfulltrúa án þess að formleg ákvörðun hafi verið tekin um það á þar til bærum vettvangi, þ.e. í forsætisnefnd. Margir aðrir borgarfulltrúar eru mikið á ferðinni í opinberum erindagjörðum án þess að þeim standi til boða afnot af bifreiðum borgarinnar eins og gerst hefur í þessu tilviki. Brýnt er að skýrar reglur gildi um bílafríðindi kjörinna fulltrúa er og að komið verði í veg fyrir notkun þeirra á bifreiðum Reykjavíkurborgar án þess að skýr heimild liggi fyrir um slíkt.

11. Lagt fram að nýju bréf skrifstofu borgarstjórnar, dags. 7. maí 2014, með tillögu borgarfulltrúa Sjálfstæðisflokks um endurskoðun á samgöngusamningi ríkis og Reykjavíkurborgar, sem vísað var til borgarráðs á fundi borgarstjórnar 6. maí sl. Jafnframt lögð fram umsögn umhverfis- og skipulagssviðs, dags. 26. maí 2014. R14050048

Borgarráð leggur til að tillagan verði samþykkt svo breytt:

Borgarráð felur borgarstjóra að óska eftir endurskoðun á samgöngusamningi ríkisins og Reykjavíkurborgar.