„Eins og nýju strákarnir þori ekki í keppnina“

„Það er bara eins og þessir nýju strákar þori ekki í keppnina,“ segir Viktor Örn Andrésson, Matreiðslumaður ársins 2013 og Norðurlandameistari 2014. Keppninni Matreiðslumaður ársins árið 2014 var frestað á dögunum vegna ónægrar þátttöku. Aðeins fjórir skráðu sig til leiks.

Viktor Örn keppti í þriðja sinn í ár og segir að það sé allur gangur á því hve margir skrái sig til leiks. Það hafi rokkað á milli tíu og tuttugu. Aldrei hafi þó jafnfáir skráð sig og nú.

„Ef það eru fjórir þá er ekki einu sinni hægt að hafa forkeppni,“ segir Viktor Örn. Reglurnar í keppninni undanfarin ár hafa verið á þann veg að fimm keppendur komast í úrslit.

Viktor Örn er í íslenska kokkalandsliðinu sem stendur í undirbúningi fyrir HM í Lúxemborg í nóvember. Hann ætlaði sér ekki að taka þátt sjálfur því að æfingar landsliðsins skarast á við keppnina. Aðspurður hvort ekki væri frábær undirbúningur fyrir HM að keppa í Matreiðsumanni ársins líkt og knattspyrnulandsliðin spila æfingaleik auk keppnisleika segir Viktor Örn:

„Þetta er eins og félagsliðin myndu setja leik á sama tíma og það væru landsliðsæfingar í gangi.“

Metnaðar- og áhugaleysi

Jakob H. Magnússon, matreiðslumeistari og dómari, segist hafa heyrt alls kyns afsakanir fyrir því hve keppendur eru fáir. Tímasetningin sé slæm, erfitt að nálgast hráefnið og önnur verkefni standi í veginum. Hann gefur þó lítið fyrir þær.

„Ég held að það sé aðallega metnaðar-, áhuga- og hvatningarleysi um að kenna. Ef kokkar ætla sér að keppa gera þeir það þrátt fyrir allar úrtölur og neikvæðni.“

Jakob segir í pistli á Veitingageiranum að það að keppa í matreiðslukeppni sé frábær og einstök reynsla sem endist út starfsævina hvernig sem fari í keppninni. Af því tilefni rifjaði Jakob upp sögu af áhugasömum kokki sem starfaði á sveitahóteli. Mætti hann með fatið sitt sem þótti frekar gamaldags og lummó.

„Hinir þátttakendurnir í hroka sínum pískruðu sín á milli og gerðu góðlátlegt grín að  matnum hans,“ rifjar Jakob upp. Eins og í bestu ævintýrum var umræddur kokkur valinn í liðið sem vann síðar til gullverðlauna í alþjóðakeppni í Þýskalandi.

Maður er með fullt hús

Viktor Örn segir æfingar fyrir HM í nóvember ganga rosalega vel. Næsta æfing sé á mánudaginn þar sem heitir réttir verða framreiddir. Þá keppir landsliðið einnig í flokki kaldra rétta. Hann á ekkert endilega von á því að taka aftur þátt í keppninni um Matreiðslumann ársins.

„Maður er náttúrulega með fullt hús. Maður veit ekki hvort maður eigi að fara í aðrar keppnir,“ segir Viktor Örn hlæjandi en hann varð sem fyrr segir Norðurlandameistari í mars. Auk hans hefur Ragnar Ómarsson orðið Norðurlandameistari en það var árið 2003.

Vantar nýjan vettvang

Hafliði Halldórsson, forseti Klúbbs matreiðslumeistara sem verið hefur dómari í keppninni undanfarin ár, segir í samtali við RÚV að tímasetningunni sé líklegast um að kenna. Haustið hafi hentað vel en með auknum ferðamannastraumi sé mikið að gera hjá kokkum.

Keppnin hefur undanfarin ár verið haldin í húsakynnum Menntaskólans í Kópavogi. Þar geta áhorfendur hins vegar ekki fylgst með kokkunum við störf heldur aðeins virt tilbúna rétti fyrir sér. Því vanti betri vettvang fyrir keppnirnar.