Bæjarstjóri lætur lagfæra kindahólf

Ásgeir Eiríksson, bæjarstjóri í Vogum, segir að til standi að láta yfirfara hólf fyrir kindur til að tryggja að öryggismál séu í lagi á Reykjanesbrautinni.

„Þetta er að öllum líkindum á höndum sveitarfélagsins að annast þetta viðhald. Við erum ekkert að hlaupast undan neinu varðandi ábyrgð á því,“ segir Ásgeir, aðspurður.

Í Fréttablaðinu fyrir helgi kvörtuðu feðgar á Vatnsleysuströnd yfir því að kindur slyppu ítrekað úr hólfinu, sem ekki hefði verið haldið við í mörg ár. Þeir töldu Vegagerð Íslands bera ábyrgð á viðhaldinu en svo virðist sem yfirvöld í Vogum eigi að sjá um viðhaldið.

„Ég veit af þessum girðingum. Við höfðum fengið ábendingar um að sauðfé væri að valsa meðfram Reykjanesbrautinni, sem er alvarlegt mál. Við munum á næstunni gera viðeigandi ráðstafanir til að þessi mál verði í lagi,“ segir Ásgeir.

Nokkuð virðist vera á reiki hvort samningar séu í gildi um viðhald hólfsins. Einn samningur var gerður árið 1994, annar í kringum síðustu aldamót og svo ein samningsdrög til viðbótar árið 2008.

„Það eru alls konar flækjuatriði í þessu sem gerir það að verkum að ég vil skoða þetta mál heildstætt og eiga samtal við fjárbændur um hvað sé eðlilegt og hverjar skyldur aðila séu í þessu sambandi,“ segir Ásgeir.