Nýr tími fyrir Harmageddon

Félagarnir Frosti Logason og Máni Pétursson mæta til leiks með þátt sinn Harmageddon á X-inu í dag á nýjum tíma. Þátturinn verður áfram þriggja klukkustunda langur morgunþáttur en hefst nú klukkan níu í stað átta.

„Við nennum ekki að vakna fyrr og viljum ekki vera alvarlegir fyrir klukkan níu,“ segir Máni léttur í samtali við Vísi. Frosti er nýsnúinn aftur úr ferðalagi sínu til Asíu og Afríku og mætir því væntanlega endurnærður til leiks.

Máni segir ómannúðlegt að bjóða hlustendum upp á spjall við stjórnmálamenn fyrir klukkan níu á morgnana.

„Við verðum á þessum tíma allavega þar til klukkunni verður breytt.“

Eftir breytinguna er ljóst að Harmageddon er kominn í beina samkeppni við Virka morgna á Rás 2 sem er í loftinu á sama tíma á virkum dögum. Þar stýra skútunni þau Andri Freyr Viðarsson og Gunna Dís Emilsdóttir.

Þá mun útvarpsmaðurinn Ómar Eyþórsson snúa aftur með morgunþáttinn sinn sem verður á dagskrá milli klukkan sjö og níu.

Hér má hlusta á X-ið.