Lækkun olíuverðs skilar sér ekki til íslenskra neytenda

Heimsmarkaðsverð á hráolíu hefur ekki verið lægra í fjögur ár en þessi lækkun virðist ekki hafa skilað sér til íslenskra neytenda. Framkvæmdastjóri FÍB segir að svo virðist sem hún hafi runnið í vasa hluthafa olíufélaganna. 

Þetta hér (sjá myndskeið með frétt) sýnir lækkun heimsmarkaðsverð á Brent-hráolíu sem er sú sem Íslendingar flytja inn og selja í eldsneyti. Tunna af Brent-olíunni kostar núna 77 dollara og er á sama verði og í nóvember fyrir réttum fjórum árum. 

Við skulum núna sjá þróun bensínverðs á Íslandi. Eins og sést hefur bensínverðið ekki lækkað í réttu hlutfalli við lækkun hráolíuverðs. Og maður veltir fyrir sér ástæðunni? Gætu það verið gengisáhrifin?

Við skulum þá kíkja á stöðu Bandaríkjadollars gagnvart krónu á þessu sama tímabili. Og þá kemur í ljós, að verðsveiflur dollars gagnvart krónu hafa verið óverulegar. Dollarinn kostaði 112 krónur í 16. nóvember 2010 en kostar 124 krónur núna. 

Þögult samráð?

Kunnum við einhverjar skýringar á því hvers vegna þessi lækkun hefur ekki skilað sér til neytenda? „Því miður er þetta þróun sem við höfum séð áður. Olíufélögin virðast vera fljótari að hækka þegar heimsmarkaðsverð hækkar og sitja lengur á lækkunum. Frá sjónarhóli fyrirtækjanna þá eru menn að halda í sér bara til að græða fleiri krónur,“ segir Runólfur Ólafsson framkvæmdastjóri FÍB.

Lækkunin rennur þá bara beint í vasa hluthafa olíufélaganna? „Það liggur í hlutarins eðli. Auðvitað er það þannig að þetta er fákeppnismarkaður þannig að aðhaldið frá markaðnum sjálfum er ekki sem skyldi.

Óttist þið að það sé þögult samráð á bensínmarkaði á Íslandi? „Það hefur stundum verið sagt að það þurfi ekkert að hittast í Öskjuhlíðinni. Það má segja að verðþróunin sýni stundum að menn eru að framkvæma sömu hlutina og það er einhver sem virðist leiða og hinir elta,“ segir Runólfur.