Unnið að aðgerðum í þágu leigjenda

Unnið er að aðgerðum í þágu þeirra sem eru á leigumarkaði samkvæmt Eygló Harðardóttur, félags- og húsnæðismálaráðherra. Þetta sagði hún í fyrirspurnartíma á Alþingi í morgun. Hún hafnaði því að skuldalækkunaraðgerðir ríkisstjórnarinnar gagnist ekki leigjendum.

Eygló segir að það hafi komið skýrt fram að stjórnvöld séu að huga að aðgerðum sem snúa að leigjendum. „Bæði hæstvirtur forsætisráðherra og hæstvirtur fjármála-og efnahagsráðherra sögðu á kynningunni og við blaðamenn á kynningunni að það væri verið að vinna að tillögum sem snúa að leigjendum og við höfum sýnt það, svo sannarlega, að þessir menn standa við orð sín,“ sagði hún.

Stjórnvöld hafa verið gagnrýnd fyrir að horfa framhjá leigjendum í aðgerðum sem kynntar voru á mánudag. Helgi Hjörvar, þingmaður Samfylkingarinnar, er einn þeirra en hann var fyrirspyrjandi í umræðunum í dag.

„Fólkið á leigumarkaðnum varð fyrir alveg sama áfallinu, leiga þess hækkaði í takt við þá óðaverðbólgu sem hér varð eftir hrun,“ sagði Helgi. „Ég held að flestum, ef ekki öllum, í þessum sal finnist það sjálfsagt sanngirnis- og réttlætismál að fyrst verið er að leiðrétta verðtryggð lán hjá þeim sem þó eiga sitt eigið íbúðarhúsnæði hljóti þeir sem eru á leigumarkaði að eiga að njóta sams konar aðgerða.“

Eygló hafnaði því að leigjendur fengu ekki ávinning af skuldaaðgerðunum. „Það er raunar töluverður hluti af skuldaleiðréttingunni sem fer í persónuafslátt vegna þess að fólk er ekki lengur með lán,“ sagði hún.

„Síðan vil ég benda á að í séreignarsparnaðinum er sérstaklega verið að hvetja ungt fólk, sem er þá væntanlega á leigumarkaðnum, til þess að leggja til hliðar og það getur þá notað það sem útborgun til kaupa á húsnæði,“ sagði Eygló í umræðunum.