DV stendur við frétt sína

„Borgarfulltrúi fer með rangt mál - Hljóðupptökur staðfesta frétt DV,“ segir á vef DV.

Guðfinna J. Guðmundsdóttir, annar borgarfulltrúa Framsóknar, sakaði í dag blaðamann DV um lygar og rangan fréttaflutning um fyrirtæki í eigu Svans Guðmundssonar, eiginmanns hennar. Í fréttinni er haft eftir Svani að hann vonist til þess að Guðfinna beiti sér fyrir hagsmunum fyrirtækisins, Smáíbúða ehf., sem leitar að lóðum til að reisa gámahús í höfuðborginni. Hún sagði þó í samtali við DV að hún hefði ekki í huga að leggja fram málefni fyrirtækisins, en fari svo að það verði lagt fram þá myndi hún víkja sæti.

Í kjölfar fréttaflutningsins birti hún fjölmargar, umdeildar athugasemdir og í samtali við Vísi sagðist hún standa við hvert orð. Aðspurð hvort henni þættu athugasemdirnar málefnalegar sagðist hún vera komin með nóg af DV og það endurspeglist í því sem hún sagði í athugasemdakerfinu.

DV hefur birt hljóðupptökur af samtali blaðamanns við þau hjón en Guðfinna verður afar reið þegar líða fer á símtalið. „Ég skil ekki hvað í ósköpunum þið á DV sem eruð alltaf að reyna að eyðileggja mannorð fólks og vera með einhverjar samsærisfréttir, af hverju í ósköpunum þið ætlið núna að fara að búa til eitthvað samsæri og rugl úr þessu. Það liggur ljóst fyrir að meirihlutinn í borginni hefur ekki áhuga á þessu,“ segir hún í samtali við blaðamann DV.

Hljóðupptökurnar eru hér að neðan.

Svanur Guðmundsson, framkvæmdastjóri Smáíbúða ehf. Guðfinna Jóhanna Guðmudsdóttir, borgarfulltrúi Framsóknar.