Guðfinna stendur við orð sín

„Ég var reið þegar ég skrifaði þetta. DV þarf að fara að átta sig á því að fólk á fjölskyldu; börn og barnabörn,“ segir Guðfinna Jóhanna Guðmundsdóttir spurð hvort henni þykja ummæli þau sem hún lét falla í kommentakerfi DV í nótt málefnaleg. Hún segist í samtali við Vísi ekki hafa í hyggju að bakka með orð sín, þvert á móti stendur hún við hvert orð. „Þetta lýsir því hvernig mér leið á þessum tímapunkti,“ útskýrir Guðfinna. „Ég er eiginlega bara komin með algjörlega nóg af DV. Það endurspeglast í því sem ég sagði í kommentakerfinu.“

Að mati Guðfinnu vantar meiri umfjöllun í fjölmiðlum um það sem skipti máli í þjóðfélaginu, margt sé að hjá Reykjavíkurborg en margir fjölmiðlamenn einbeiti sér að því að niðurlægja einn borgarfulltrúa.  

Guðfinna segir fréttina í DV ranga. Hún segir blaðamann hafa snúið út úr hverju orði sínu og að hún hafi reynt að útskýra fyrir blaðamanni gámahúsnæðismál manns hennar sem kom upp á síðasta kjörtímabili þegar hún var ekki í borgarstjórn. Þá hefði því ekki verið sýndur áhugi, þeir, maður hennar og samstarfsfélagi, óskuðu eftir fundi með Degi B. Eggertssyni til þess að kynna gámahúsnæði sem þeir höfðu verið að hanna en fengu ekki svar. Í kjölfarið var þeim tjáð að ekki væru til lóðir hjá Reykjavíkurborg. Það hafi ekki komið upp aftur eftir að hún tók sæti í borgarstjórn. Guðfinna segist ekki skilja hvers vegna sé verið að fjalla um málið nú. „Það er bara verið að búa til samsæri sem á ekki við rök að styðjast.“

En þú hlýtur að skilja að ummæli mannsins þíns þar sem hann virðist vonast til þess að málið verði tekið upp á ný eru tilefni í nýja frétt?

„Hann segir þetta ekkert,“ svarar Guðfinna. „Það er snúið út úr öllu í þessari frétt.“ Hún bendir á að hún sé þar að auki í minnihluta og gæti hvort sem er lítið beitt sér í málinu.

Þú gerir þér grein fyrir því hversu alvarlegt það er sem þú ert að segja er það ekki, þú ert beinlínis að saka blaðamanninn um lygar?

„Þessi frétt er röng. Maðurinn minn sagði að hann stæði með mér og að ég stæði með honum en ekkert í samhengi við þetta mál. Hann [blaðamaðurinn] setur þetta í allt annað samhengi.“

Svanur Guðmundsson, eiginmaður Guðfinnu, segir einnig rangt eftir sér haft í frétt DV. Hann segist hafa játt því við blaðamann DV að hagsmunatengsl væru á milli hans og Guðfinnu. „Já, sagði ég, hún er konan mín,“ útskýrir Svanur og segist hafa sagt sig passa upp á hana og hana passa upp á sig. En hann segist jafnframt hafa bent á það að innan borgarinnar væru engir hagsmunarárekstrar, engin umsókn frá honum lægi hjá borginni og hann hygðist ekkert starfa með borginni hvað varðaði gámahúsnæðismálin í framtíðinni. „Þeir hagsmunir sem við erum að vinna að eru heimili, þrif og eldamennska.“ Hann vill lítið tjá sig um hvort sér þyki Guðfinna hafa brugðist málefnalega við í kommentakerfi DV en segist standa með konu sinni. „Fólk hefur skap og það er alveg hægt að gagnrýna það,“ útskýrir Svanur en segir það skiljanlegt að reiðast þegar heilu og hálfu dagarnir fari í að bera tilbaka það sem er rangt eftir manni haft.