Reykjanesbær gefur bæjarbúum sand

„Við erum fyrst að hugsa um að göturnar verði öruggar þegar íbúar fari að skjóta upp flugeldum annað kvöld. Það er mikil hálka í sumum götunum,“ segir Guðlaugur H. Sigurjónsson, framkvæmdastjóri umhverfis- og skipulagssviðs Reykjanesbæjar, í samtali við Vísi, en bærinn býður nú bæjarbúum upp á sand til að strá á götur bæjarins. Víkurfréttir sögðu frá þessu fyrr í dag.

Sandinum var komið fyrir á fjórum stöðum; á planinu við enda Norðurvalla, við botnlanga við Þrastartjörn, á planinu við Reykjaneshöll og við skemmu á Valhallarbraut (Ásbrú).

Guðlaugur sagðist hafa rennt framhjá hrúgunum um þrjúleytið nú síðdegis og að ljóst væri að bæjarbúar hafi nýtt sér þessa þjónustu enda hafði vel gengið á sandinn.

Guðlaugur segir þetta alls ekki vera einhver sérstök sparnaðaraðgerð af hálfu bæjarins, heldur einungis ætlað sem aukna þjónustu við íbúa. „Bærinn hefur verið að sanda stofnæðar og helstu gönguleiðir og mun gera það áfram. Ég hugsa að þetta verði alveg örugglega gert aftur síðar.“