Akstur strætó hefst tveimur tímum fyrr á sunnudögum

Ný vetraráætlun Strætó á höfuðborgarsvæðinu tekur gildi þann 4. janúar næstkomandi. Í tilkynningu frá Strætó segir að töluverðar úrbætur hafi verið gerðar á leiðakerfinu og eru breytingarnar flestar til komna vegna ábendinga frá farþegum um hvað megi betur fara.

Meðal þess sem breytist er aksturstími vagna á sunnudögum en hann mun nú hefjast um tveimur tímum fyrr, eða um klukkan 9:30. Þá mun tíðni aksturs aukast og verður hann á 15 mínútna fresti á annatíma í öllum helstu hverfum, í stað 30 mínútna áður. Einhverjir vagnar munu breyta um númer og sumar akstursleiðir breytast.

Nánari upplýsingar um breytingarnar má finna í meðfylgjandi skjali og á heimasíðu Strætó.