Ísland hyggst sýna metnað í loftslagsmálum

Christiana Figueres, framkvæmdastýra rammasamnings Sameinuðu þjóðanna um loftslagsmál, átti í gær fundi með Gunnari Braga Sveinssyni, utanríkisráðherra og Sigurði Inga Jóhannssyni, umhverfis- og auðlindaráðherra í dag. Hún er hér á landi til að taka þátt í Arctic Circle ráðstefnunni, sem fram fer um helgina.

Samkvæmt tilkynningu frá Utanríkisráðuneytinu lagði Figueres áherslu á að aðildarríki leggi fram metnaðarfullar áætlanir um minnkun á losun í yfirstandandi samningaviðræðum um nýtt hnattrænt samkomulag.

Gunnar Bragi og Sigurður Ingi hétu stuðningi við væntanlegt Parísarsamkomulag sem stefnt er á að verði undirritað á næsta ári. Einnig sögðu þeir að Ísland hygðist sýna metnað í loftslagsmálum.

Parísarsamkomulaginu er ætlað að taka gildi árið 2020 og setja ný markmið fyrir ríki heims til 2030. Figueres lagði þó áherslu á að nýr samningu verði að marka skýra stefnu í loftslagsmálum til lengri tíma.

„Ráðherrarnir undirstrikuðu mikilvægi umhverfismála og að Ísland hefði það markmið að vera öðrum þjóðum fyrirmynd, m.a. með nýtingu endurnýjanlegra orkugjafa. Einnig væri binding kolefnis úr andrúmslofti með skógrækt og landgræðslu mikilvægur þáttur í loftslagsstefnu Íslands og Ísland miðlaði þróunarríkjum af reynslu sinni á þessum sviðum í gegnum Jarðhitaskóla og Landgræðsluskóla Háskóla SÞ, sem starfræktir eru hér á landi,“ segir í tilkynningunni.

Í því samhengi minntustu þeir á ræðu Sigmundar Davíðs Gunnlaugssonar á allsherjarþingi Sameinuðu þjóðanna í september. Að Ísland stefndi að því að hætta notkun jarðefnaeldsneytis; slíkt væri þegar raunin varðandi orkuframleiðslu til rafmagns og hitunar, en vinna þyrfti að þessu markmiði í samgöngum og fiskveiðum.

Figueres heimsótti einnig Hellisheiðarvirkjun og kynnti sér niðurstöður nýrrar rannsóknar um kolefnisbindingu í jarðvegi. Rannsóknin var að miklum hluta unnin af íslenskum vísindamönnum og hefur vakið heimsathygli.

Þar að auki hitti nemendur Jarðhitaskóla og Jafnréttisskóla SÞ og fræddist um starfsemi þeirra.