BBC með þátt um Fiskistofu og heilbrigðiskerfið í vinnslu

„Þeir voru að fjalla um flutning Fiskistofu og læknaverkfallið, hvernig komið er fyrir heilbrigðiskerfinu eftir hrunið,“ segir Anna Lísa Björnsdóttir, starfsmaður hjá bókaútgáfunni Guðrúnu sem nýlega aðstoðaði lið frá BBC við tökur hér á Íslandi. „Þeir gerðu þátt um hrunið árið 2008 og síðan þá hafa þeir komið öðru hvoru og skoðað hvernig Ísland er að fást við eftirleik hrunsins.“

Anna Lísa segir að tökulið fréttaskýringarþáttarins Eòrpa hafi komið hingað í lok síðasta mánaðar og verið í eina viku. Þátturinn hefur verið á dagskrá BBC Alba frá árinu 1993 en stöðin er skosk stöð BBC þar sem töluð er gelíska. „Þátturinn svipar til Landans en fjallar um Evrópumál.

Anna Lísa segir að tökuliðið hafi skipulagt þáttinn í kringum fyrirhugaðan flutning Fiskistofu. „Innslagið um heilbrigðiskerfið kom eiginlega þannig til að ég sendi þeim grein sem Anna Sigríður Arnardóttir skrifaði um hvað hún hafi verið heppin að greinast með brjóstakrabbamein árið 2014 en ekki 2015. Þeir ákváðu því að lengja dvölina til að fjalla um heilbrigðiskerfið líka.“

Í innslaginu um heilbrigðiskerfið ræddi tökuliðið við Önnu Sigríði og Helga Sigurðsson, prófessor í krabbameinslækningum, heilbrigðisráðherra og formann Félags almennra lækna. „Innslagið fjallaði um læknaskort á Íslandi og ástæður þess að ungir læknar hiki við að koma aftur heim til Íslands eftir sérnám.“

Tengja allt við skosku eyjarnar

Anna Lísa segir að í innslaginu um Fiskistofu hafi verið rætt við tvo starfsmenn stofnunarinnar, sjávarútvegsráðherra, bæjarstjórana í Hafnarfirði og á Akureyri og svo fasteignasala á Akureyri. „Þar var eingöngu fjallað um þennan fyrirhugaða flutning. Auðvitað var komið inn á deilurnar um flutninginn, óánægju starfsfólks, en þeir koma mikið að mikilvægi þess að allt landið sé í byggð. Þeir tengja allt sem þeir gera við skosku eyjarnar. Þeir eru með þann vinkil. Ef eitthvað væri til dæmis flutt frá Glasgow og út í eyjarnar, myndi það þá þýða að það væri meiri byggð í eyjunum, betri þjónusta og svo framvegis.“

Þættirnir Eòrpa eru 30 mínútur á lengd og á gelísku. „Það eru 60 þúsund manns sem tala gelísku og búa flestir á þessum skosku eyjum.

Hafa áhuga og skilning á byggðapólitík

Anna Lísa segir að þáttagerðarmennirnir hafi áður komið til Íslands og gert þátt um makrílveiðar, náttúrulega orku og fleira. „Þeir koma flestir frá Skotlandi og eyjunum – Lewis, Barra og þeim eyjum - og svo líka Orkneyjum og Hjaltlandseyjum. Þeir hafa mikinn áhuga og skilning á byggðapólitík og hafa mikinn áhuga á að sjá eyjarnar í byggð. Þeir voru með þann vinkil og fannst þessi mál áhugaverð út af því.“

Þátturinn verður frumsýndur á BBC Alba í lok þessa mánaðar.