„Þetta er ekkert minna en stórkostlegt“

Bókaverðlaun barnanna voru afhent við hátíðlega athöfn í Borgarbókasafni við Tryggvagötu í dag, sunnudaginn 21. september.

Bókin Ragnstæður í Reykjavík eftir Gunnar Helgason hlaut flest atkvæði í flokki íslenskra barnabóka og Amma glæpon eftir David Walliams, í þýðingu Guðna Kolbeinssonar, í flokki þýddra barnabóka.

Tæplega fjögur þúsund börn af öllu landinu tóku þátt í valinu, sem fór fram á heimasíðu Borgarbókasafns og í grunnskólum og bókasöfnum um allt land.

Gunnar Helgason segir það mikinn heiður að hljóta verðlaunin. „Þetta er ekkert minna en stórkostlegt. Að fá svona verðlaun frá lesendunum sjálfum því maður er að skrifa þetta með þá von í brjósti að börnin tengi við þetta. Þetta er þá staðfesting að það hafi tekist, alla vega að einhverju leyti. Ég er í skýjunum“

Gunnar vinnur nú að síðustu bókinni í fótboltaröðinni svokölluðu en áður hefur hann skrifað þrjár barnabækur um ævintýri fótboltakappa. Sú fjórða mun bera heitið Gula spjaldið í Gautaborg og er stefnt að því að hún komi út í kringum 18. október.

Sex börn fengu viðurkenningu fyrir þátttökuna í valinu, þær Bryndís Perla Garðarsdóttir, Elsa Björg Sturlaugsdóttir, Íris Thelma Viðarsdóttir, Aþena Helgadóttir og Anna Rakel Guðjónsdóttir. Tilviljun réði því að eingöngu stúlkur voru dregnar út í þetta skiptið. Þær fengu að launum leikhúsmiða og máltíðir á Hamborgarabúllunni, og Anna Rakel fær að aukum Gunnar Helgason í heimsókn í bekkinn sinn.

Handhafar bókaverðlaunanna sjálfra fengu bók Ragnars Axelssonar, Fjallaland, að gjöf frá safninu.