Fréttastef RÚV notað í óleyfi: Búið að loka fyrir myndböndin

Bresku samtökin Alexandra Palace Television Society, sem notuðu fréttastef Ríkissjónvarpsins í óþökk höfundarins, hafa nú tekið lokað fyrir aðgang að myndböndum sínum á Youtube. „Ég er hræddur um að ég viti ekki mikið um þetta stef,“ segir Simon Vaughan, skjavörður samtakanna í svari fyrir fyrrispurn Vísis um málið. Vísir fjallaði um málið í síðustu viku.

Samtökin voru með mikinn fjölda myndbanda á Youtube-síðu sinni og rúmlega 2500 áskrifendur. Myndböndin á síðu samtakanna voru afar vinsæl, en í síðustu viku var samanlagt áhorf á þau rúmlega tvær og hálf milljón skipta. Í upphafi hvers myndbands var fréttastef Ríkissjónvarpsins spilað, en það stef var samið af Birgi Tryggvasyni sem er afar ósáttur með þessa ólöglegu notkun.

Sóttu á netið fyrir nokkrum árum

„Við sóttum stefið á netinu fyrir um þremur til fjórum árum síðan,“ segir Vaughan í samtali við Vísi. Í síðustu viku mátti þó sjá að elsta myndbandið þar sem fréttastefið var notað á vegum samtakanna var frá árinu 2009. „Við sóttum það á vefsíðu þar sem hægt var að sækja tónlist sem var ekki varin með höfundarétti og okkur þótti það passa vel við merki samtakanna sem við vildum sýna í upphafi hvers myndbands. Ég hræddur um að ég viti ekkert um hvort það sé notað á Íslandi,“ segir Vaughan ennfremur í samtali við Vísi.

Vill að STEF gæti réttar síns

Birgir Tryggvason höfundur hefur leitað til Sambands tónskálda og eigenda flutningsréttar (STEF) og vill að samtökin beiti sér í málinu. Hann vill leita réttar síns gagnvart samtökunum. „Þetta er auðvitað fyrst og fremst furðulegt mál. Ég vil að STEF gæti réttar míns í þessu máli,“ segir hann.

Birgir furðar sig á svörum Vaughan. „Ég veit ekki á hvaða vefsíðu þeir hafa sótt stefið. Það væri mjög athyglisvert að vita það. Við erum búnir að fasa hljóðbútinn út og snúa honum við. Það er algjörlega staðfest að þetta er minn hljóðbútur en hljómgæðin eru einstaklega slæm,“ bætir hann við. Birgir segir að það líti út fyrir að einhver hafi tekið þetta upp úr fréttatíma RÚV, klippt hljóðbútinn niður og svo sett hann á netið.

APTS verðlaunað

Á vefsíðu Alexandra Palace Television Society, sem reyndar virðist komin svolítið til ára sinna, er tekið fram að samtökin hafi unnið til hinn svokallaða Shiers Trust styrk árið 2001. Styrkurinn er veittur af hinum svokölluðu Royal Television Society samtökum. Styrkurinn er veittur árlega er er allt að tvö þúsund pund, eða tæplega fjögur hundruð þúsund krónur. Markmiðið með styrkveitingunni er að verðlauna þá sem rannsaka, kynna og kenna sögu sjónvarpsins á einhvern hátt. Meðal þeirra sem hafa fengið styrk er sir David Attenborough, sjónvarpsmaðurinn frægi.

Á Youtube-síðu APTS-samtakanna kemur fram að samtökin vilji varðveita munlega og skriflega sögu frumkvöðla í þróunar sjónvarpsins. Nafn samtakanna er dregið af Alexandra Palace í norðurhluta Lúndúna, en á síðunni kemur fram að þar hafi fyrstu reglulegu, skýru sjónvarpsútsendingarnar hafist árið 1936. 

Einnig er tekið fram að allir þeir sem steli efni af síðunni verði tilkynntir til stjórnenda Youtube.