Sexting algengara en flesta grunar

Miklum fjölda ljósmynda af fáklæddum börnum og unglingum er dreift um netið á ári hverju. Fyrir tilstuðlan internetsins og með aukinni tækni hefur það færst í aukana undanfarin ár. Því er mikilvægt að upplýsa fólk og auka forvarnir og þekkingu barna og foreldra á þessari nýju birtingamynd kynferðisofbeldis sem virðist hafa náð að ryðja sér til rúms í heiminum öllum og virðist vera komið til að vera. Þetta er á meðal þess sem fram kom á Barnaverndarþingi 2014 á Hilton hóteli í dag.

Þetta nýja fyrirbæri kallast „sexting“ og hefur Barnahús komið upp sérstökum gagnagrunni til að fylgjast með slíkum málum. Margrét K. Magnúsdóttir, sálfræðingur og sérhæfður rannsakandi í Barnahúsi, bar erindið upp á málþinginu í dag.

„Sexting er afleiðing tækninýjunga og er mun algengara en flesta grunar. Í Bandaríkjunum hafa verið gerðar rannsóknir sem sýna það að um 20 prósent barna á aldrinum 12-14 ára hafa sextað. Þetta er mun algengara á meðal unglinga sem eru farnir að líta á þetta sem sjálfsagðan hlut,“ sagði Margrét í ræðu sinni í dag.

„Einföld skilgreining á sexting er: að senda, fá sent og deila með öðrum kynferðislegum myndum og/eða texta á rafrænu formi og einskorðast ekki einungis við farsíma," bætti Margrét við. 

Móðir Tinnu heldur baráttu hennar áfram

Hugsjónar- og baráttukonan Tinna Ingólfsdóttir vakti verðskuldaða athygli á máli þessu í apríl síðastliðnum. Þrettán ára gömul sendi hún nektarmyndir af sjálfri sér til manna sem hún hafði einungis spjallað við á internetinu. Myndirnar fóru í kjölfarið í dreifingu.

Málið tók verulega á Tinnu bæði á líkama og sál og hafði alvarlegar afleiðingar í för með sér. Lokaði hún sig af félagslega og átti erfitt uppdráttar í grunnskóla. „Ég var kölluð druslan,“ sagði hún í viðtali í Íslandi í dag sem gestir málþingsins horfðu á í dag. Tinna lést þann 21.maí síðastliðinn en móðir hennar sat málþingið og heldur baráttu Tinnu áfram. 

„Tinna hafði alltaf kjark og þor til að segja sína meiningu og þarna gerði hún það eftirminnilega og ég er glöð að hún hafi náð að vekja máls á þessu. Frænka hennar hafði þó einnig orðið fyrir þessu og við Tinna höfðum oft rætt þetta og vorum meðvitaðar um hættuna. Það að hún vissi þetta var samt ekki næg forvörn til að passa sig á að gera ekki svona hluti. Þetta sýnir hvað félagslegur þrýstingur og léleg sjálfsmynd hefur mikil áhrif á að slíkt gerist,“ sagði Inga Vala Jónsdóttir, móðir Tinnu.

Hótanir í garð þolenda algengar

Margrét sagði fæsta gera sér grein fyrir því hvað það í raun sé sem flokkast sem barnaklám, en myndir af börnum yngri en fimmtán falla undir þann flokk.

„Um 88 prósent af myndum á ólöglegum barnaklámssíðum hefur verið stolið með þessum hætti. Þetta er alvarlegur glæpur og ég held að fæstir krakkar geri sér grein fyrir því að það að senda eða fá sendar slíka myndir sé barnaklám. Allt undir 15 ára aldri er flokkað undir barnaklám,“ sagði Margrét.

Margrét nefndi þær hættur sem það getur haft í för með sér að senda frá sér slíkar myndir og að auðvelt sé að komast í einskonar vítahring í kjölfar þessa. Hótanir í garð þeirra sem senda myndirnar væru algengastar. „Hótanir eru mjög algengar. Það er auðvelt fyrir viðkomandi að hóta því að senda myndina eitthvert annað eða að setja þær á netið ef hann fær ekki fleiri myndir.“

Hún sagði hótanir í garð þeirra sem senda myndirnar mjög algengar. „Það er mjög auðvelt fyrir viðkomandi að hóta því að senda myndirnar eitthvert annað eða að setja þær á netið ef hann fær ekki fleiri myndir.“ 

Málunum fer ört fjölgandi

Margrét sagði málum sem þessum fara ört fjölgandi og hefur því verið settur upp gagnagrunnur til að fylgjast með þessum málum svo hægt sé að sporna gegn því. Nauðsynlegt sé að takast á við þessa nýju birtingamynd af kynferðislegu ofbeldi sem tilkomin er af nýrri tækni.

„Þetta er vissulega ný birtingamynd af kynferðisofbeldi en viðbrögð barnaverndarnefndar við slíkum málum er eins og önnur kynferðismál. Sexting er áhættuhegðun sem ber að tilkynna til Barnaverndar,“ sagði Margrét.