Háskóli Íslands í samstarf við kínverskan háskóla

Kristín Ingólfsdóttir, rektor Háskóla Íslands, hefur undirritað samstarfssamning við Tsinghua-háskólann í Kína sem í alþjóðlegu gæðamati er almennt metinn annar áhrifamesti háskóli í Kína, næst á eftir Peking-háskóla.

Kristín og Chen Xu, forseti háskólaráðs Tsinghua-háskóla í Kína, undirrituðu saminginn í nýlegri heimsókn Kristínar til höfuðborgarinnar Beijing.

Í tilkynningu frá Háskólanum segir að Chen Xu, sem er prófessor í rafmagnsverkfræði, sé ein af fáum konum í Kína sem eru í forsvari fyrir háskóla. Með samningnum opnast möguleikar á stúdentaskiptum, kennaraskiptum og samstarfi um skilgreind rannsóknaverkefni.

„Tsinghua er einkum þekktur sem tækniháskóli en hefur smám saman aukið breidd í námsframboði og rannsóknum og starfar nú á sviðum hug-, félags- og menntavísinda auk heilbrigðis-, verkfræði og tæknigreina.  Í alþjóðlegu gæðamati er Tsinghua almennt metinn annar áhrifamesti háskóli í Kína, næst á eftir Peking-háskóla. Tsinghua-háskóli var stofnaður árið 1911, sama ár og Háskóli Íslands, en á þeim tíma var Qing-keisaradæmið að líða undir lok í Kína.

Kristín heimsótti læknaskólann við Tsinghua, m.a. deild í verkfræðilegri læknisfræði, þar sem unnið er þverfræðilega að verkefnum sem snúa að  greiningu sjúkdóma og meðferð þeirra.  Mikil áhersla er lögð á nýsköpun og tækniyfirfærslu og hafa mörg þessara verkefna leitt til stofnunar sprotafyrirtækja. Tsinghua vinnur í nánu samstarfi við Johns Hopkins háskólann í Bandaríkjunum á þessu sviði.  Á næstunni verður opnað nýtt háskólasjúkrahús sem mun starfa í nánum tengslum við Tsinghua.

Auk læknisfræðilegrar verkfræði kom fram mikill áhugi á samstarfi við Háskóla Íslands á sviðum raunvísinda, bókmennta, kynjafræði og lyfjafræði en lyfjafræðideild er ein nýjasta deildin í Tsinghua.

Kristínu Ingólfsdóttur var boðið til Kína til að flytja erindi á alþjóðlegri ráðstefnu kvenrektora.  Erindi hennar fjallaði um mikilvægi samstarfs í menntun, vísindum og nýsköpun þvert á menningar- og tungumálasvæði.  Ráðstefnuna sóttu kvenrektorar alls staðar að úr heiminum auk fjölda kínverskra kvenna sem koma að stjórnun mennta- og jafnréttismála í Kína. Frumkvæði að ráðstefnunni hafði Liu Jinan, fyrrverandi rektor Communication University of China, CUC, en þetta var sjötta ráðstefnan af þessu tagi sem hún hefur staðið fyrir í samstarfi við kínversk menntamálayfirvöld og UNESCO,“ segir í tilkynningunni.